Dás oainnát makkár doaimmat Finnmárkku politiijain leamaš mannan ija.
Bearjadateahkeda dieđihedje politiijat ahte diibmu 22.55 ožžo dieđu muhtin náveha birra Sirpmás lei buollán diibmu 22.55.
– Návehis eai leat šibihat, eat ge bala buollima leavvat, čálle politiijat.
Báikkis ledje buollinčáskadeaddjit ja politiijat dieđihit iežaset áigut dutkat buollinsaji.
Gaskaboddosaččat duoguštan
Diibmu 00.39 dieđihedje politiijat ges ahte leat gaskaboddosaččat duoguštan muhtin goalmmátlot-jahkásaš albmá vuodjinkoartta Álttás.
– Mii fuomášeimmet muhtin «viisá» guhte iešdáhtos šleaŋggáhalai biillain olles johtolatrieggá birra, dieđihit politiijat.
Jaskkodahtte feastta
Diibmu 00.56 dieđihedje politiijat ahte ledje ožžon moaitámušaid go garra musihka geažil Lávželuovttas Hámmárfeasttas.
– Mii leat fitnan báikkis ja gohččon sin jaskkodit, čállet politiijat.
Badjelmeare gárremiin
Váile guovttis dieđihedje ges politiijat ahte ledje dolvon muhtin russa dearvvašvuođaiskosii Álttás, go russa galgá leat leamaš badjelmeare gárremiin.
Váile golmmas dieđihedje ges ahte lei leamaš riedja muhtin olgobáikkis Girkonjárggas, muhto go politiijat jovde báikái, de lei doppe jo jaskkodan dilli.
Áššáiduhtte albmá
Diibmu 03.20 dieđihedje ges politiijat ahte leat áššáiduhttán muhtin njealjátlot-jahkásaš albmá go navdet su gárrenoaivvis vuodján.
Veahá maŋŋelaš dieđihedje maid ahte leat mihtidan leavttu Hámmárfeasttas ja okta olmmoš sáhkkohalai go galgá leat vuodján 60 km/d:s dakkár báikkis gos leaktomearri lea 50 km/d.
– Divrras filéat
Váile guđas dieđihedje vel politiija ahte muhtin viđátlot-jahkásaš Litauenii gullevaš almmái lei bissehallan Geađgeluobbala rádjástašuvnnas.
Sus ledje mielde 205,7 kilo guollefiléat.
– Diet filéat gárte divrrasin, almmái sáhkkohalai 20 500 ruvnnu ovddas, čállet politiijat.
