– Buot mánáin lea riekti oadjebas birrasii, ja ahte mánáidgárdi ja skuvla leat givssidankeahtes báikkit. Dan dihte lea dehálaš ahte buot fylkkat ožžot sadjái sierra givssidanáittardeaddji. Dat dahká váhnemiidda ja mánáide álkibun čoavdit ášši, lohká máhtto- ja integrerenministtar Jan Tore Sanner.
– Buot mánáin lea riekti oadjebas birrasii, ja ahte mánáidgárdi ja skuvla leat givssidankeahtes báikkit. Dan dihte lea dehálaš ahte buot fylkkat ožžot sadjái sierra givssidanáittardeaddji. Dat dahká váhnemiidda ja mánáide álkibun čoavdit ášši, lohká máhtto- ja integrerenministtar Jan Tore Sanner.
Ođđajagemánus bovdejedje buot fylkkaid searvat ráđđehusa ođđa našunála ortnegii mas sáhttet ásahit givssidanáittardeaddji juohke fylkii. Sierra áittardeaddjit galget veahkkin nannet báikkálaš barggu givssideami vuostá mánáidgárddiin ja skuvllain. Dán čállá Máhttodepartemeanta preassadieđáhusas.
Našunála ortnet, báikkálaš čovdosat
Dál leat dušše vihtta fylkka main leat sierra givssidanáittardeaddjit. Čavčča 2018 rájes viiddida ráđđehus ortnega vai buot fylkkat sáhttet searvat dasa. Ruhtadeapmi galgá juhkkot fylkkasuohkana ja stáda gaskkas. Stádabušeahtas lea várrejuvvon njeallje miljovnna ruvnno mii galgá gokčat stáda olggosgolu.
Ođđa ortnet galgá sihkkarastit ahte áittardeaddjit besset bargat beroškeahttá gii skuvlaeaiggát lea. Ortnet galgá maid veahkkin buoridit ovttasbarggu dáláš ohppiid- ja oahpahalliáittardeddjiiguin mat barget mobbenáššiiguin joatkkaskuvllas.
– Mobben lea issoras dilli daidda mánáide geat dan vásihit, ja lea duođalaš servvodatváttisvuohta. Bargu ferte álggahuvvot árrat ja mánáidgárddis juo, lohká Sanner.
Evalueret dađistaga
Guovllureforbma buktá rievdadusaid fylkkajuoguide 2020 rájes. Dan dihte áigu ráđđehus seammás go álggaha givssidanáittardeaddji ortnega fylkkaide, álggahit čuovvolanárvvoštallama ortnegii.
– Fylkkaid givssidanáittardeaddji lea dehálaš álgu. Árvvoštallan fas buktá ođđa jurdagiid movt áittardeaddjiortnet berre leat go ođđa guovllut leat 2020 rájes. Ulbmil lea oažžut bissovaš, čalmmus ja olámuttos áittardeaddjiortnega mánáidgárdemánáide, ohppiide ja váhnemiidda, lohká Sanner.
Fylkkat šaddet Oahpahusdirektoráhta bokte dieđihit ortnegii.
