Mannan geasi, jagi 2017, goddui 61 tonna unnit luossa go jagi 2016 goas godde 85 tonna. Muhto dat mii goddui, lei stuorra luossa. Sivva dasa lea Norgga ja Suoma Deanusoahpamuša guolástanráddjehusat ja dulvegeassi.
Deanučázádaga Guolástanhálddahus (DG) dieđiha preassadieđáhusas ahte dál leat sii ovttasráđiid Suomain rehkenastán man olu luossa ja guvžá bivdui Deanučázádagas mannan geasi, jagi 2017:s.
– Oktiibuot bivde 61 tonna luosa mas 0,3 tonna luosa luite fas johkii. Luossabivdu lea mealgat geahpeduvvon 2016 geasi ektui, mii leai 85 tonna. Sálašgeahpedeami ferte geahččat go miehtá geasi lei čáhcádat dulvvas. Dát lei maid vuosttaš jahki go Norgga ja Suoma ođđa Deanusoahpamuš lei fámus, ja bivdoáigodat geahpeduvvui mealgadit ovdal go bivdoáigodat álggii, čállá DG ráđđeaddi Narve S. Johansen.
Stuorra luosat
Johansen lohká Norgga beale lassánii stuorra luossa (badjel 7 kilo) sálaš ja eai goddon nu olu vuollel 7 kilosaš luosat 2016 ektui.
– Gaskamearálaš deaddu lei 5,5 kilo. Olu stuorra goadjimat goddojuvvojedje. Dušše Norgga bealde dieđihedje bivdit ahte ledje goddán 24 stuorra luosa, goadjima, badjel 20 kilo, muitala ráđđeaddi Johansen.
Eambbo stággobivdu
Norgga ja Suoma bealde goddui guktuid beale Deanu bealli olleš Deanučázádaga sállašis.
– Stággobivdit godde 72 proseantta olles sállašis. Muđui goddui 28 proseantta buođus, njáŋgofierpmis ja golgadeamis. Norgga bealde godde 2,1 tonna guvžžáid, mii lea sullii seamma dásis go golbma maŋimuš jagi. Eanaš guvžžát leat goddon Deanunjálmmis, lohká DG ráđđeaddi Narve S. Johansen preassadieđáhusas.
