Servvodatnjunuš gean dollet giddagasas Romssas go sivahallo leat seksualálaš rihkkosáššái seaguhuvvon, lea dál biddjon eret ovtta stivrras mas son lea mielde.
Servvodatnjunuš gean dollet giddagasas Romssas go sivahallo leat seksualálaš rihkkosáššái seaguhuvvon, lea dál biddjon eret ovtta stivrras mas son lea mielde.
Áššáiduhtton dievdu lea leamašan miellahttu stivrrain ja sus leat leamaš luohttámušdoaimmat ollu jagiid. Sus leat ain ollu doaimmat.
Maŋŋel go biddjui háldogiddagassii, de lea okta daid servviin gos son lea stivralahttu, mearridan bidjat su eret stivradoaimmas, čállá VG.
– Son lea biddjon eret iežas doaimmas dassái go ášši lea gárvásit dutkojuvvon, lohká searvvi stivrajođiheaddji VGi.
Doalahit su ain doaimmas
Servvodatnjunuš dollo giddagasas Romssas go sivahallo leat seksualálaš rihkkosáššái seaguhuvvon.
Eará fitnodagas gos áššáiduhtton dievdu lea stivrajođiheaddji, lea cealkán ahte sii eai bija su eret doaimmas, nu guhká go son ii leat dubmehallon.
– Mii doalahit su doaimmas nu guhká go ii leat celkon duopmu. Son lea hirbmat buori barggu bargan ja lea ihána resurssa midjiide, lohká beaivválaš jođiheaddji fitnodagas.
Duoguštan mátkkerehkegiid
Aviissa dieđuid vuođul bargá áššáiduhtton dievdu ráđđeaddin eiseválddiid ovddas, muhto ii leat čielggas maid eiseválddit dahket dáinna áššiin.
Nordlys čállá maid ahte áššáiduhtton dievdu lea ollu mátkkoštan. Dan oktavuođas leat politiijat guorahallame dievddu mátkkerehkegiid ja duoguštan daid.
Gillájeaddji dán áššis lea nuorra dievdu gii lea dorvoohcci. Son galgá leat čilgen ahte áššáiduhtton dievdu lei sutnje lohpidan veahki beassat orrut Norggas, čállá Nordlys aviisa.
Servvodatnjunuš ii mieđit iežas sivalažžan áššáiduhttimis.
(©NTB)
