Guovttis golbmasis, geat gillájit lossamielain, 80 proseantta sis geain lea ballu ja badjel 90 proseantta alkoholisttain eai oaččo makkár ge diagnosa, čájeha ođđa guorahallan.
Álbmotdearvvašvuođainstituhtta lea čađahan iskkadeami Norgga dábáleamos psyhkalaš váttuid birra, ja čájehuvvo ahte dearvvašvuođasuorggis eai fuomáš psyhkalaš váttuid.
– Mediačállosiid bokte sáhttá orrut dan láhkai ahte oallugat definerejit dábálaš váttisvuođaid psyhkalaš váddun ja ahte ožžot divššu, muhto min dutkan čájeha ahte unnán olbmot váldet oktavuođa dearvvašvuođasurggiin ja vel unnit olbmot ožžot divššu psyhkalaš váttuid geažil, dadjá guorahallama dutkanjođiheaddji Fartein Ask Torvik NTB ođasdoaimmahahkii.
Eai oainne váttisvuohtan
Guorahallan čájeha ahte guovttis golbmasis, geat gillájit lossamielain, 80 proseantta sis geain lea ballu ja badjel 90 proseantta alkoholisttain eai oaččo makkár ge diagnosa.
Dát soaitá dáhpáhuvvat danin go olmmoš dávjá ii definere iežas váttisvuođaid psyhkalaš váddun.
Ovdamearkka dihtii soitet oallugat oaivvildit ahte eai juga menddo olu alkohola, sii oaivvildit dávjá ahte ieža válljejit man olu juhket eai ge definere juhkama alkoholisman.
Dát olbmot dávjá eai fuomáš man láhkai alkohola váikkuha sin eallimii, eai ge sii mana doaktára lusa jugešvuođa geažil, baicce danin go eai oaččo nahkáriid.
Jugešvuohta tabuášši
Iskkadeapmi čájeha ahte sis, geain leat alkoholaváttisvuođat, ožžot hárvvimus diagnosa.
Dušše 3 proseantta dutkama oasseváldiin ožžon diagnosa iežaset fástadoaktára luhtte, ja 7 proseantta ožžo divššu spesialistta dearvvašvuođasuorggis.
Dát dáhpáhuvvá jáhkkimis danin go fástadoavttir sádde pasieantta viidáset go jáhkká sus eará psyhkalaš váttuid.
– Jugešvuohta lea tabuášši, ja danin lea olbmuide váttis muitalit alkoholageavaheami birra doaktárii. Sáhttá maid nu ahte olbmot eai dieđe ahte sis leat sosiála váttisvuođat, oađđinváttut ja lossa jurdagat danin go juhket olu alkohola. Dalle livččii hui dehálaš ahte sihke fástadoavttir ja earát dovdet psyhkalaš dávdamearkkaid, dadjá Torvik.
