Finnmárkkus ledje feastariejat sotnabeaivvi čuovganeapmái.
Finnmárkkus ledje feastariejat sotnabeaivvi čuovganeapmái.
Girkonjárggaš šadde politiijat viežžat muhtin goalmmátlot-jahkásaš albmá muhtin olgobáikkis, go almmái lei nihttán báikki bargiid.
Politiijat gohččo maid albmá bissut eará sajis, iige máhccat šat dán olgobáikái, dieđihii Finnmárkku politiijaguovlu twitteris badjelaš ovttas ihkku.
Váile beal guovttis dieđihedje ges politiijat ahte leat ožžon dieđu ahte muhtin priváhta dálus Hammerfeasttas leat leamaš doarrumat.
– Okta almmái lea doaruhan nuppi albmá, goappašagat leaba goalmmát-njealjátlot-jahkásaččat, dieđihedje politiijat.
Dás lea ásahuvvon ášši.
Lihkolaš loahppa
Guovtti áigge dieđihedje ges politiijat dáhpáhusas mas lei lihkolaš loahppa.
Sii ledje nammalassii ožžon dieđu ahte Čáhcesullo gávpotguovddážis lei muhtin unna, bruvnna vielpáš luovos ruohttamin.
Olbmot ledje fáhten vielpáža gitta, ja eaiggát gávdnui loahpas.
Dasto šadde politiijat fas joatkit gárrenolbmuid jaskkodahttit.
Diibmu 01.32 šadde muhtin goalmmátlot-jahkásaš albmá gohččut guođđit Hammerfeastta gávpotguovddáža.
– Almmái lei leamaš searvan rikkeremiidda muhtin olgobáikkis, čállet politiijat.
Sullii seamma áiggis šadde ges Álttá politiijat fitnat muhtin priváhta dálus jaskkodahttimin feastta.
Gohččo nissona guođđit olgobáikki
Badjelaš diibmu golmmas dieđihedje ges politiijat ahte leat šaddan gieldit muhtin njealjátlot-jahkásaš nissona máhccamis šat ovtta olgobáikái Álttás.
Nisu gohččojuvvui bissut eará sajis iđidii.
Váile njealjis dieđihedje politiijat ahte ledje seamma ládje šaddan gieldit muhtin goalmmátlot-jahkásaš albmá Girkonjárggas.
Son galgá leat rikkeren muhtin olgobáikkis, ja politiijat gohččo su guođđit gávpotguovddáža.
Iđit beallái šadde politiijat vel bissehit feasttaid sihke Álttás ja Hammerfeasttas.
Goappašat sajiin ledje feastadoallit jegolaččat ja jaskkodedje maŋŋil go politiijat ledje fitnan báikkiin.
