Go Siv Jensen gárvodii indiánan Ruhtadandepartemeantta čakčafestii, de gal bovttii reakšuvnnaid olusiin, earret eará sámediggepresideanttas.
Go Siv Jensen gárvodii indiánan Ruhtadandepartemeantta čakčafestii, de gal bovttii reakšuvnnaid olusiin, earret eará sámediggepresideanttas.
VG dat čállá ahte Siv Jensen moitojuvvo maŋŋil go almmuhii gova alddis mas lea gárvodan indiánan departemeantta čakčafeasttas.
Gárvodii indiánan
Feasta lei dakkár gos buohkat galge gárvodit iešguđet ládje ja das ledje golbma fáttá: «supersáŋgárat», «fantasy» ja «wild west».
Siv Jensen válljii maŋimuš fáttá mielde gárvodit ja bođii ge festii biktasiin mii galgá sulastahttit Amerihká álgoálbmogiid árbevirolaš biktasiidda.
– Heivetmeahttun
Aiddo válljejuvvon sámediggepresideantta Aili Keskitalo mielas dattetge ii lean gal dát somás govva.
Son čilge riikaáviisii ahte su mielas lea heivetmeahttun go ruhtadanministtar geavaha áitojuvvon álgoálbmoga symbolaid «somás gimmickan».
– Dát lea kultuvrralaš appropriašuvnna ovdamearka. Mun dieđán makkár dovdu šaddá jus oainnát fake-gávtti. Mun in jáhke Jensen lei coggat dakkára badjelii, son lei áddet ahte dat lea heivetmeahttun. De in ádde manne dákkár biktasa ge coggá, lohká Keskitalo.
– Álgoálbmogiid kultuvrrat ja divrras symbolat eai galggaše geavahuvvot kostyman. Dát dađi bahábut leat bázahusat muhtinlágan kolonista-gáttus, lohká sámediggepresideanta.
Dán son ovddidii maid iežas instagram bokte.
– Veahá gal fertejit gierdat
Siv Jensena stáhtačálli, Petter Kvinge Tvedt, ii loga gal áddet Keskitalo moaitagiid.
– Leat go sihkar ahte dát lea duođas? jearrá son, ovdal go VG bokte bealušta kostymageavaheami:
– Jensena kostyma ii leat mihkkege váttisvuođaid. Jáhkán eatnasat Norggas oaivvildit dán leat dábálaš kostymafeastan. Muhtimat ledje gárvodan mearrarievvárin, earát ges supermanan, cowboyan dahje indiánan, lohká Tvedt.
Son ávžžuha sámediggepresideantta buorebut dovdagoahtit leaikkaid.
– Eai olbmot sáhte nie hearkkit leat, lohká son.
