Disdaga maŋŋelgaskabeaivvi lea muhtin gaikon sisa muhtin bartii Idjajávrris, mii lea gaskal Kárášjoga ja Leavnnja, ja Bissojohduoddaris, Kárášjoga ja Porsáŋggu suohkanis.
Maŋimuš áiggiid leat leamaš olu sisagaikumat Porsáŋggus. Siv Anita Aslaksen lea okta dain guhte lea vásihan ahte su bartii leat gaikun sisa.
Vihtta sisagaikuma
Nordkáhpa leansmánni Magnus Nilsen muitala ahte sin politiijaguovlu lea iskamin ášši ja ahte dan rádjái de dihtet ahte Idjajávrris lea leamašan guovtti bartii sisagaikun ja Bissojohduoddaris maid guovtti bartii, ja dasto vel ovtta biilii lea sisagaikun leamašan.
Nordkáhpa politiijat leat leamašan guovllus váldime iskosiid.
Eai leat ollen vel buot iskosiid váldit, muhto lohká dutkanbargu joatká viidásit dassážii go leat geargan ja ožžon buot duogášiskosiid mii sáhttá veahkehit gávdnat dan gii lea gaikon barttaide ja biilii.
Čavgilemiid geahččame lea go čanus dain
Nilsen lohká sin ožžon olu cavgilemiid mat sáhttet guoskat dán áššái, makkár biila olbmos lei ja makkár olmmoš son lei gii lea oidnon guovllus ja barttaid olggobealde.
– Mii fertet geahččat cavgilemiid maid leat ožžon ja lea go dain makkárge čanus mii sáhttá čájehit ahte lea okta ja seamma olmmoš gii lea gaikon sisa barttaide ja biilii, čilge Nilsen.
Davvenjárgga politiijaguovddáš dutká ášši dábálaš vuogi mielde.
