Sotnabeaivvi suoidnemánu 2.beaivve almmuhii NSR iežas facebook-siidui ahte sii leat juolludan 120 000 ruvnno Beskán Luossa Rock festiválii.
Fuomášupmi
Go Ávvir válddii oktavuođa NSR jođiheddjiin Beaska Niillasin, de son fuobmái ahte lei boastut šaddan sin bealis,
vaikko liikká geažuha ahte sáhttá leat vuohki jienaid čoaggit boahtte čavčča válgii.
– Dál lea geassi ja nu lahkonit válggat. Lea dehálaš čalmmustahttit NSR-politihka, joatká Beaska Niillas.
Son mieđiha dat soaitá leamašan politihkalaš stunta sin bealis.
Sámedikkis ožžon doarjaga
Dat lei šaddan boastut. NSR lei dušše evttohan ruhtadoarjaga Sámediggái.
Beskán Luossa Rock lea ožžon 120 000 ruvnno Sámedikkis ja lea vel beassan sin fásta postii.
–Dat lea hui buorre go mii leat sámedikki fástapoastas. Dal mii eat dárbbaš juohke jagi ohcat sis ruhtadoarjaga ja šaddá álkit plánet festivála go mii diehtit min bušeahta, muitala Beskán Luossa Rocka jođiheaddji Stig Arne Somby.
Hušas vahkkoloahppa
NSR stivramiellahtut leat leamašan Beskán Luossa Rockas ja ledje searvan oaggungilvvuide ja konseartta guldalan.
– Ledjen hui hoahpuid siste go čállen facebookčállosa ja nu šattai ge boastut, muitala NSR jođiheaddji Beaska Niillas.
