Dál leat 87 olbmo unnit barggu haga Finnmárkkus, go diibmá dáid muttuid.
Dál leat 87 olbmo unnit barggu haga Finnmárkkus, go diibmá dáid muttuid.
1211 olbmo Finnmárkkus ledje miessemánu loahpas registrerejuvvon oalát bargguheapmin.
– Dát lea 87 olbmo unnit go diibmá dáid muttuid, ja dat dagaha golbma proseantta bargoveagas. Muđuid riikkas leat 2,6 proseantta bargoveagas bargguhisvuođas, čállá NAV Finnmárku preassadieđáhusastis
Industriijasuorggis njiejai eanemusat
Industriijaealáhusas njiejai bargguhisvuohta eanemusat.
Miessemánu loahpas ledje NAV:s registrerejuvvon 227 bargguhis olbmo, geain lei industriijaduogáš. Diibmá ledje 45 olbmo eambbo.
Inšenevra- ja IKT-fágasurggiin lea maid bargguhisvuohta njiedjan, diibmá dáid muttuid ledje 55 olbmo bargguhisvuođas, dál ges 37 olbmo.
Liikká industriijaealáhusas eanemus bargguhisvuohta
Seamma ládje go muđuige riikkas, de gullet ain eatnašat dain geat leat bargguhisvuođas industriijaealáhussii, dasto čuvvot ges sii geain lea duogáš huksen- ja rusttetealáhusain.
Eanaš almmáiolbmot
Eatnašat dain geat leat bargguhisvuođas Finnmárkkus, leat almmáiolbmot.
– 830 dain geat leat registrerejuvvon bargoohccin leat almmáiolbmot, dát lohku lea njiedjan njeljiin proseanttain diimmážis, čállá NAV Finnmárku.
351 nissona leat registrerejuvvon bargoohccin, dát lohku lea njiedjan 14 proseanttain.
Rabas virggit
Dál leat sullii seamma olu rabas virggit go diibmá dáid muttuid.
Leat registrerejuvvon 525 rabas virggi Finnmárkkus miessemánus.
– Eanaš rabas virggit leat dearvvašvuođa- ja fuollasuorggis ja oahpahussuorggis, muhto industriijavirggit lassánit eanemusat, čállá NAV Finnmárku.
Dán áigodagas leat registrerejuvvon 32 rabas virggi industriijasuorggis, dát lea 130 proseantta lassáneapmi diimmážis.
Eanemus ja unnimis
Guovdageainnus lei eanemus bargguhisvuohta miessemánus, 5.9 proseanttain. Dasto čuvvot Várggát (4.9 proseantta) ja Gáŋgaviika (4.7 proseantta).
Unjárggas lea unnimus bargguhisvuohta 1.9 proseanttain ja Álttás 2 proseanttain.
