Duorastaga deaivvadeigga eanandoalloministtar ja birasministtar Nordfjella guovllu rádjágielddaid sátnejođiheddjiiguin.
Duorastaga deaivvadeigga eanandoalloministtar ja birasministtar Nordfjella guovllu rádjágielddaid sátnejođiheddjiiguin.
Eanandoallo- ja biebmoministtar Jon Georg Dala ja dálkkádat- ja birasministtar Vidar Helgesen, deaivvadeigga duorastaga Nordfjella guovllu gielddaid sátnejođiheddjiiguin.
– Lei ávkkálaš čoahkkin, go lonohalaimet dieđuid ja oaiviliid. Mun háliidan ahte mis galgá leat buorre gulahallan daid gielddaiguin maidda dát guoska, ja lean ádden dan láhkai ahte buohkat háliidit dahkat nu buori barggu go vejolaš dusten dihte hástalusaid mat sáhttet deaividit boahtte áiggis, dadjá Jon Georg Dale preassadieđáhusastis.
Jávkadit goddeealu
Dale lea miehtan Biebmobearráigeahčču ávžžuhussii ahte jávkadit olles goddeealu Nordfjella 1. sonas, dahkan dihte dan maid sáhttet eastadan dihte CWD-dávdda leavvamis.
Ovttasráđiid Birasdirektoráhtain galgá Biebmobearráigeahčču geassemánu 15. beaivvi rádjai hábmet konkrehta plána mas galgá boahtit ovdan mo áigot jávkadit goddeealu. Gottit galget leat jávkaduvvon ovdal miessemánu 1. beaivvi 2018:s.
Eanandoalloministtar finai cuoŋománu 24. beaivvi geahččamin Nordfjella guovllu.
