Ráđđehus lea rievdaduvvon stáhtabušeahtas árvalan lasihit doarjaga ja ruhtadeami iešguđet sámi doaimmaide, liikká ii leat sámediggepresideanta duđavaš.
Ráđđehus lea rievdaduvvon stáhtabušeahtas árvalan lasihit doarjaga ja ruhtadeami iešguđet sámi doaimmaide, liikká ii leat sámediggepresideanta duđavaš.
Ráđđehus evttoha reviderejuvvon stáhtabušeahtas lasihit doarjaga sámegiel mánáidgárddiide 5 miljovnna ruvnnuin, lasihit Aarborte suohkana sámi giellahálddašanguvlui ja sihkkarastit Gaska-Norgga sámeskuvlla viidásat doaimma Aarborttes, muhto ráđđehus ii áiggo ásahit ođđa bušeahttamálle Sámedikki ja sámi áigumušaid várás, nu mo Sámediggi lea sin bivdán árvvoštallat.
– Lea buorre go ráđđehus evttoha lasihit doarjaga sámi mánáidgárdefálaldagaide 5 miljovnna ruvnnuin reviderejuvvon našunálabušeahtas, eará ii livčče oppa vuordimis ge go dáža mánáidgárdesuorgi stuorradiggeáigodagas lea ožžon viehka stuorra lassáneami, dadjá sámediggepresideanta Vibeke Larsen.
– Sámi áigumušat duohtavuođas ožžon unnit
– Sámi áigumušat, nu go oahpahus, ealáhusovddideapmi ja kulturdoaibmabijut, leat duohtavuođas ožžon uhcit juolludemiid maŋimus jagiid, go buohtastahttá vástideaddji dáža surggiiguin. Mun válljen áddet dán liigejuolludeami reviderejuvvon našunálabušeahta lohpádussan ahte ráđđehus čavčča stáhtabušeahtas lokte Sámedikki ja sámi áigumušaid bušeahta, dadjá Larsen.
Sámedikkis leat leamaš konsultašuvnnat ođđa bušeahttamálle birra Sámedikki várás vai oažžu buoret einnostanvejolašvuođa ja váikkuhanfámu bušeahttarámmain Sámediggái ja sámi áigumušaide, muhto eai šaddan ovttaoaivilii dán birra.
– Go Stuorradiggi lea bivdán ráđđehusa árvvoštallat ođđa bušeahttamálle Sámedikki várás, iige ráđđehus leat čuovvolan dakkár evttohusain, de leat mus vuordámušat ahte Stuorradiggi dál váldá ovddasvástádusa ja bivdá ráđđehusa ásahit dakkár bušeahttamálle mii sihkkarastá Sámediggái váikkuhanfámu Sámedikki ja sámi áigumušaid bušeahttarámmaid ektui ja bidjá vuođđun ahte Sámediggi lea álbmotválljen orgána, ii ge stáhta etáhta, loahpaha Larsen.
