NRK gumpi jo gárvvis, fargga johttájit davás

NRK čájeha Finnmárkkuduoddara nu go boazu oaidná dan.

Badjelaš 1000 bohcco galget johtit dálveorohagas geasseorohahkii, ja ovtta álddus lea kamera oaivvis gitta, čállá NRK preassadieđáhusastis.

Johtin álgá go eallu vuolgá, eai ge sii váldde vuhtii NRK sáddenáiggi. NRK2 sáddegoahtá cuoŋománu 21. beaivvi diibmu 19.55, ja olles johtima beasat čuovvut NRK neahtta-TV bokte.

NRK čuovvu Sara bearraša ealu, ja prográmmajođiheaddjit leaba Ronald Pulk ja Rebecca Strand. Soai buktiba reportášaid ja ođđasiid mátkkis.

Váttis filbmenbargu

– Mii háliidit čájehit olbmuide juoidá man hui ollugat eai beasa vásihit muđuid, namalassii leat mielde giđđajohtimis. Mu niehku lea ahte loahpas sáddagis beassat čájehit go áldu guoddá miesi, maŋŋel go leat rasttildan meara Fálásullui, muhto suvdimis šaddet erenoamáš govat. Dušše dat dahká gelddolažžan čuovvut mielde olles sáddema, muitala NRK Sámi prošeaktajođiheaddji Per Inge Åsen.

(Ášši joatká gova vuolábealde)

Duoddaris lea ain dálvi, ja TV-joavku dárbbaša fierttu go galget čađahit sáddema.

Sii johtet viiddis guovlluin gosa ii ole mobiltelefuvdnasignála.

Satellihttarusttegat deddet ollu, nu ahte NRK Sámis ja NRK Finnmárkkus leat šaddan gávdnat ođđa čovdosiid vai sáhttet sáddet signálaid áimmu bokte. Golbma joavkku lonohallet vuodjit várrečohkas várrečohkkii.

Sii ceggejit sierra stašuvnnaid nu ahte besset sáddet TV-govaid Norgii ja olles máilbmái.

Álddus kámera oaivvis

NRK girdá dronaiguin vai besset čájehit ollislaš govaid.

Joavku vuodjá maid skuteriiguin, ja ovtta álddus galgá leat unna kámeraš gitta oaivvis, nu ahte geahččit besset oaidnit giđđajohtima nu movt boazu oaidná dan.

Sátta álgá cuoŋománu 21. beaivvi, ja loahpahuvvo cuoŋománu 27. beaivvi maŋŋelgaskabeaivvi.

NRK lea ovdal bures lihkostuvvan nu gohčoduvvon «hilljánis TV:in», mii dohkkehuvvui maid ođđa sátnin Giellaráđis 2013:s.