Odne almmuhuvvo stuorradiggedieđáhus boazodoalu birra. Norgga Boazosápmelaččaid Riikkasearvvi jođiheaddjis eai leat gal alla vuordámušat dasa.
Odne almmuhuvvo stuorradiggedieđáhus boazodoalu birra. Norgga Boazosápmelaččaid Riikkasearvvi jođiheaddjis eai leat gal alla vuordámušat dasa.
Eanandoallo- ja biebmoministtar Jon Georg Dale ovdanbuktá odne Stuorradikki dieđáhusa boazodoalu birra, man leat gohčodan «Guhkes árbevierru – erenoamáš vejolašvuođat».
Dát dáhpáhuvvá diibmu 13.00, Eanandoallo- ja biebmodepartemeanttas Oslos odne.
Unnán vuordámušat
Norgga Boazosápmelaččaid Riikkasearvvi (NBR) jođiheaddjis Ellinor Marita Jåmas eai leat stuora vuordámušat.
– Mus eai leat stuora vuordámušat dieđáhussii. Mii leat ráđđádallan departemeanttain, muhto go eat ožžon oaidnit dieđáhusa ovdal leimmet juo geargan ráđđádallamiin, de eat sáhttán doarjut dan.
Jåma lohká ahte stuorradiggedieđáhusas ii leat mearkkašupmi boazodollui vuos:
– Mearkkašupmi boahtá easka go NBR lea dorjon daid doaimmaid mat ovddiduvvojit das, lohká Ellinor Marita Jåma.
Vuordá guohtoneatnamiid čalmmustahttot
Sámediggeráđi Mariann Wollmann Magga, guđes lea boazodoallu oktan iežas ovddasvástádussurggiin lohká vuordit stuorradiggedieđáhusa atnit guohtoneatnamiid suddjema guovddážis.
– Dat lea dehálaš ášši boazodollui, lohká son.
Dasa lassin oaivvilda Wollmann Magga ahte stuorradiggedieđáhusas lea mearkkašupmi boazodollui, muhto maiddái sámi servodahkii, go dan bokte signaliserejuvvo ahte boazodoallu lea dehálaš sámi ealáhus.
Sávvá Stuorradikki áŋgiruššat
Wollmann Magga lohká Stuorradiggedieđáhusain obbalohkái leat mearkkašumi.
– Daid atnet dávjá vuođđun go boazodoallu šiehtadallá stádain, daidda refererejit jahkeviissaid ja atnojit maid vuođđun go bidjet johtui iešguđet doaibmabijuid. Maŋimus Stuorradiggedieđáhussii boazodoalu birra, mii almmuhuvvui 1992:s, ain refererejit dávjá, čilge son ja lasihastá:
– Danne sávan ahte Stuorradiggi áŋgirušša go dán ášši gieđahallagohtet.
