-Almmuhus-
OĐĐASAT– Sara vuoitu lea Sámi vuoitu

– Sara vuoitu lea Sámi vuoitu

-

-

– Go Jovsset Ánte  Sara vuoitá guoddalanášši stáda vuostá, de lea dat lávki ovddasguvlui sámiid rivttiid dáfus, go dá lea stuorát ášši go dušše jearaldat boazologu geahpedeamis, dadjá Aili Keskitalo.

Guoddalanáššis gaskal Jovsset Ánte Sara ja stáda, vuittii Sara fas nuppes.

Duomus daddjo ahte stáda gáibádus Sarai njuovvat bohccuid 75 heggii, rihkku artihkal 27 ON-konvenšuvnnas siviila ja politihkalaš vuoigatvuođaid birra.

Nuppiin sániin de mearkkaša dat ahte stádas ii leat lohpi bágget badjeolbmo jođihit doalus vuolláibáhcagiin, go dat duohtavuođas mearkkaša ahte badjeolmmoš hehttejuvvo doaimmaheames iežas kultuvrra, čállá Norgga Sámiid Riikkasearvvi (NSR) presideantaevttohas AIli Keskitalo preassadieđáhusastis.

– Háliidan giitit Jovsset Ántte go guoddá dán lossa noađi dan bokte ahte vuodjela ášši stáda vuostá. Lea ovttaskas áššiin main sápmelaččat riektelanjain vuosttaldit vearrivuođaid ahte mii duođaid beassat duođaštit ja geahččalit iežamet rivttiid álbmogin, ja mun jáhkán mii galgat ráhkkanahttit iežamet ahte dá šaddá dehálaš bargovuohki midjiide jagiin ovddasguvlui oažžun dihte mieđiheami sámiid rivttiide, dadjá Keskitalo.

 

Sámi vuoigatvuođat eai dušše gávdno báhpáriin

Norggas lea konvenšuvdna siviila ja politihkalaš vuoigatvuođaid birra sajáiduhtton olmmošvuoigatvuođaláhkii, ja galgá deattuhuvvot eanet go eará lágat go lea vuostálasvuohta.

Maŋimuš jagiid leat oaidnán ahte konvenšuvnna artihkal 27 leamaš čilgehussan bissehit bieggafápmorusttegiid boazodoalloguovlluin.

– Guovtti dáin áššiin dovddan bures dan áiggis go ledjen sámediggepresideanta. Sihke Fálesráššas ja Gaelpies lihkostuvve orohagat bissehit bieggafápmoplánaid artihkal 27:in. Ahte riekti dál čujuha dáid áššiide mearkkaša ahte mii dál leat vihttanat dasa ahte sámiid vuoigatvuođat eai dušše gávdno báhpáriin, muhto ahte dain lea praktihkalaš mearkkašupmi maid, dadjá Keskitalo.

 

Rahčat ain

– Seammás diehtit ahte sápmelaččat miehtá Sámi ain rahčet ja fertejit boahtteáiggis maid rahčat iežaset vuoigatvuođaid ovdii beassat doaimmahit iežaset kultuvrra. Maiddái Jovsset Ánte Sara sáhttá šaddat rahčat viidásat jus stáda guoddala ášši. Dalle fertet mii sámepolitihkkárat nagodit doarjut ovttaskas sápmelaččaid geat rahčet iežaset vuoigatvuođaid ovddas, loahpaha Keskitalo.

 

 

 

-Almmuhus-