Jovsset Ánte Sara advokáhta Trond Biti lea duhtavaš go lágamánneriekti čuovvolii diggegotti mearrádusa, mas celket ahte stáhta geahpedangáibádus ii leat gustovaš.
Diggi hilggui stáhta guoddaleami ovttajienalaččat.
Sara advokáhtta Trond Biti lohká iežaset leat hui duđavažžan.
– Go Lágamánneriekti hilggui guoddaleami, de lei stáhta mearrádus lobiheapme. Dál in dieđe vel boahtte lávkki, muhto jus guoddaluvvo, de boahtá dieđusge ášši Alimusriektái, lohká Biti.
Lágamánnerievtti čilgehus
37-siidosaš duomus cealká lágamánneriekti ahte Eanandoallo- ja biebmodepartemeantta mearrádus, man dahke njukčamánu 10. beaivvi 2014, mas gohččo Jovsset Ánte Sara geahpedit ealu 75 heggii njukčamánu 15. beaivvi 2015 rádjai, ii leat gustovaš go mearrádus mielddisbuktá ahte rihkkot Sara vuoigatvuođa doaimmahit iežas kultuvrra nu mo SP artihkal 27 cealká.
Nu lea Lágamánneriekti hilgon departemeantta guoddaleami ja čuovvolan Sis-Finnmárkku diggegotti.
Čađat dovdu
Trond Biti dovddasta iežas vuordán ahte Lágamánneriekti hilgu ášši, go mearrádus livččii čuohcan beare garrasit Jovsset Ánte Sara dollui.
– Jus ii livčče suodjalus dakkár mearrádusaide, de livččii hui ártet ja garra rihkkun. Mus leamašan čađat dovdu ahte manná bures, muhto dieđusge ii goassege sáhte leat sihkar, dadjá Trond Biti.
Loga maid: Vuittii stáhta vuostá fas
Eambbo árvu
– Lágamánnerievtti duomus lea eambbo árvu go diggegottis, oalle buorre. Jáhkán stáhta sihkkarit šaddá guorahallat dárkilit guoddalit go duomu vai eai, lohká Biti.
Son čilge ahte diggevuogádat lea huksejuvvon nu ahte Lágamánnerievttis lea eambbo deaddu, ja guoddalanáigi lea mánu.
Illusáhka
Máret Ánne Sara lohká otná illusáhka lea geahpádusa bearrašii ja erenomáš su villjii Jovsset Ánte Sara guhte lea siiddas.
– Golget gatnjalat, mii leat nu ollu návccaid bidjan dán áššái ja leat guhká vuordán lágamánnerievtti duomu. Illudan ja lean movttet vielja bealis go dát mearkkaša nu ollu, lohká Máret Ánne Sara.
Ášši duogáš
Sis-Finnmárkku diggegoddi fámohuhtii Eanandoallo- ja biepmodepartemeantta njukčamánu 10. beaivvi mearrádusa, mas gáibiduvvui Jovsset Ánte Sara siiddaoasis geahpidit boazologu.
Duomus daddjo ovttajienalaččat ahte 75:in heakkain ii leat vejolaš birget boazodoalus, ja danne rihkku stáhta mearrádus riikkaidgaskasaš olmmošvuoigatvuođaid.
Stáhta guoddalii duomu lágamánneriektái, gos bealit deaivvadedje gieskat.
Stáhta bealis eai kommentere
Eanandoallo- ja biebmodepartemeantta gulahallanhoavda Ottar A. Løvik čállá e-poasttas Ávvirii ahte eai dáhto kommenteret duomu.
– Mii oaidnit ahte leat hilgon guoddaleami, ja áigut dál dárkilit lohkat duomu ovdal go kommenteret dan, čállá Løvik.
