-Almmuhus-
-Almmuhus-
-Almmuhus-
OĐĐASAT2016:i sápmelaš Sámedikkis: – Rabasvuohta dearvvasmahttá

2016:i sápmelaš Sámedikkis: – Rabasvuohta dearvvasmahttá

-

-

Marion Anne Knutsen muitalii Sámedikkis mo veahkaválddálašvuohta váikkuha olbmuid ja ávžžuha olbmuid rahpasit hállat dávjá dan birra, go dat dearvvasmahttá olbmo.

Mannan gaskavahku almmuhii Sámediggi ja Justiisa- ja gearggusvuođadepartemeanta raportta «Veahkaválddálašvuohta lagaš oktavuođain sámi guovlluin: Fokusjoavkostudia mas leat veahkkebálvalusa ja politiija bargit» dievasčoahkkimis.

Mannan giđa beakkehii nuorra divttasvuotnalaš nisu, Marion Anne Knutsen, go muitalii mo su ja su bearaš lei gillán dákkár veahkaválddálašvuođa dihtii.

 

Šaddan váibmoáššin

Sámedikki dievasčoahkkimis, raporta almmuheami oktavuođas, logaldalai son dan birra.

– Lea hirbmat dehálaš hállat veahkaválddálašvuođa lagaš oktavuođaid birra rabasvuođain. Munnje lea measta šaddan váibmoáššin ja mus livčče miella bargat dákkár áššiiguin boahtte áiggis. Rabasvuohta lea hirbmat dehálaš, ja man dehálaš dat lea, dan leat mii min bearrašis vásihan. Dovddan mađe eanet mun hálan dán veahkaválddálašvuođa birra mii lea čuohcan munnje ja mu bearrašii, de lea munnje dearvvaslaš. Seammás dieđán ahte dákkár hállan sáhttá leat earáide ge veahkkin. Dát hállan lea oassi dearvvasmuvvamis, lohká Marion Anne Knutsen loahpabeaivvis.

Muitala son dál lea vásihan man dehálaš lea duostat hállat rahpasit almmolašvuođas dán veahkaválddálašvuođa ášši birra, iige diktit ovttage bissehit dán hállama.

 

Loga maid: – Háliidan rabasvuođa

 

Ovdagovva Norgii ja Sápmái

Marion Anne Knutsen muitala maŋŋá go muitalii maid son lea gillán veahkaválddálašvuođa dihtii, de lea olusat, sápmelaččat ja dážat, miehtá Norgga muitalan sutnje justa dan seamma birra.

 – Mun lean bidjan Divttasvuona njunnošii go doppe mun ásan, doppe lean bajásšaddan ja min bearaš lea vásihan veahkaválddálašvuođa sámi servodagas. Danin lei munnje dehálaš dan muitalit. In leat njulgestaga šiggojuvvon, muhto lean vásihan olgguštuvvoma ja deaivan guottuid mat muitalit ahte veahkaválddálašvuođa birra ii galgga hállat. Dákkár oaivilat olbmuid gaskkas gávdnojit ain, lean ieš vásihan dan. Lea buot ahkásaččat. Divttasvutnii šaddá dát ášši lossat ovddos guvlui, muhto mun jáhkán mii nanusmuvvat dan sivas. Mun in heahpan ahte mun lean eret Divttasvuonas. Mu mielas berrešedje olbmot bidjat Divttasvuona ovdagovvan, dadjá Marion Anne Knutsen.

(Ášši joatká gova vuolábealde)


OAČČOI BÁLKKAŠUMI: Odne beasai Ávvir viimmat geiget Marion Anne Knutsenii vuoitibácci, go jienastuvvui 2016:i sápmelažžan. 
Govven: Berit Marie Lise Eira.

Ávvira neahttasiiddus lei juovlamánus jienasteapmi, gos lohkkit galge jienastit gii lea jagi 2016 sápmelaš.

Oktiibuot bohte 6373 jiena. Knutsen oaččui beali dain jienain, ja nu son vuittii. 

 

Loga maid: Oaččui badjel 3000 jiena

 

– Jáhkán ožžon eatni fámu

Olu berošteaddjit fitne sálasteamen Marion Anne Knutsena ja giite su go leamaš nu jállu ja duostil muitalit iežas ja eatnirohkis gillámuša birra.

– Lea olusat geat lohket mun lean jallu, muhto in leat iežan mielas gal. Mun jáhkán mun lean ožžon eatni fámu maŋŋá go son guđii min. Lean dovdan ahte áigi lei laddan muitalit veahkaválddálašvuođa birra ja rahčagoahtit ahte earát eai galgga ná gillát. Galgá leat eambbo rabasvuohta veahkaválddálašvuođa birra, lohká son.

-Almmuhus-