– Kulturealáhusat leat min gollit ja sámiid vejolašvuohta váldit stuorát stivrejumi sámi kultuvrra gaskkusteamis, dadjá sámediggeráđđi Mariann Wollmann Magga.
– Kulturealáhusat leat min gollit ja sámiid vejolašvuohta váldit stuorát stivrejumi sámi kultuvrra gaskkusteamis, dadjá sámediggeráđđi Mariann Wollmann Magga.
Sámi kulturealáhuskonferánsa lágiduvvo Diehtosiiddas Guovdageainnus njukčamánu 15. – 16. b. 2017, ja dat lea ođđa jurdagiid, vásihuslonohallama ja fitnodatvejolašvuođaid buorre arena sámi kulturfitnodagaide, ovddidit iežas gávpefierpmádaga ja fitnodatvejolašvuođaid. Sámediggi lágida konferánssa ovttas Sápmi Ealáhusgárddiin.
Ođđa ealáhuspolitihkka
– Deaivvadanbáiki kulturealáhusaktevrraide, politihkkariidda ja earáide lea deaŧalaš áigeguovdilis dieđuid oažžumii, ja vai Sámediggái sáhttá ovddidit ođđa ja boahtteáiggi politihka. Dán konferánssa vuođul álggaha Sámediggi ođđa ealáhuspolitihka, dadjá Wollmann Magga preassadieđáhusas.
Kulturealáhusat leat riikka gelddoleamos ja johtilepmosit šaddi ealáhusat. Sámi servodagas leat dán ealáhusas guhkes árbevierut, ja ealáhusas leat stuorra vejolašvuođat. Dál barget ealáhusas olbmot miehtá riikka sin iežaset dáidda- ja kulturilbmademiiguin.
Háliidit juohkelágan ealáhusaid
Sámediggeráđi vuođđooaidnu lea ahte mis galget leat nana ja juohkelágan ealáhusat mat váldet vuolggasaji sámi kultuvrra, giela, servodaga, luonddu ja birrasa vuođul, ja doibmet gievrras ođđaáigásaš báikegottiide vuođđun, gos olbmot háliidit ássat.
– Dávgasis ja kreatiiva miellaguoddu rievdadeapmái ja ođđasis jurddašeapmái lea deaŧalaš árvu sámi ealáhusovddideamis maiddái odne. Mii háliidit juohkelágan ealáhusaid mat geasuhit goappašiid sohkabeliid. Deaŧalaš lea ahte mis leat buorit rámmaeavttut eretfárrema jorgalahttima várás eret sámi guovlluin. Juohkelágan ealáhusaid ja bargosajiid háhkan nuoraide lea vealtameahttun deaŧalaš, jos mii galgat lihkostuvvat dainna, dadjá Wollmann Magga.
Vuordá gáibádusaid movt šaddat buorebun
Dan geažil go Sámis leat guhkes gaskkat, lea deaŧalaš ahte mis lea oktasaš deaivvadanbáiki. Fierpmádathuksen, máhtu juohkin, movttiidahttin ja giktaleapmi leat deaŧalaččat konferánssas. Kulturkonferánssas fokuserejuvvo erenoamážit movt sámi kulturvuođđu lea láiden fitnodatovddideami, ja sáhttit gullat movt min dovddus kulturealáhusbargit leat geavahan fierpmádaga lihkostuvvamii riikkaidgaskasaččat.
– Mun jáhkán ahte bohtet ollu buorit árvalusat ja ahte šaddet ollu digaštallamat, mat dolvot min viidáseappot. Mun vuorddán maiddái ahte biddjojuvvojit gáibádusat Sámediggái movt mii sáhttit veahkehit, ja movt mii sáhttit šaddat buorebun kulturealáhussuorggis, dadjá Wollmann Magga preassadieđáhusas.
