Stáhta doalaha mearrádusa ahte Jovsset Ánte Sara galgá geahpedit boazologu 75 heggii ja oaivvilda mearrádusa lobálažžan. Ráđđehusadvokáhtta deattuha dikkis ahte mearrádus lea gaskaboddosaš.
Odne loahpaha Hålogalándda Lágamánneriekti Jovsset Ánte Sara ášši meannudeami.
Ráđđehusadvokáhtta Stein Erik Jahr Dahl lea dál prosederemin ja son deattuha ahte stáhta ii leat váldán Saras eret rievtti bargat bohccuiguin, muhto leat gaskaboddosaččat mearridan boazologu su siidaoassái go orohat ii nagodan soahpat geahpedanplána.
Son muitala ahte Sara galggai geahpedit 116 heakkas 75 heggii.
– Buohkat orohagas šadde gorrelogu mielde geahpedit ja eará siiddat orohagas leat čuovvolan stáhta gáibádusa, earret Sara, logai son diggái.
Čuoččuha ahte eai váldán rivttiid eret
Stein Erik Jahr Dahl deattuha ahte mearrádus ii váldde Jovsset Ánte Saras rivttiid bargat bohccuiguin ja ahte mearrádus lea gaskaboddosaš.
– Seammás go geahpedeapmi lea čađahuvvon, de maid loahpahuvvo mearrádus. Mearrádus ii mearrit man ollu sus galget bohccot earáid ektui. Orohat sáhttá siskkáldasat boahtit ovttaoaivilii man ollu bohccot guđetge siidaoasis galget orohaga mearriduvvon logu siskkobealde, lohká ráđđehusadvokáhtta.
Fálas lea mearriduvvon bajimuš boazolohku 2000.
– Sáhttá stevdnet earáid
– Jus orohat ii boađe ovttaoaivilii eaige vuolit iežaset ealuid vai čáhkkehit Sarai saji, de lea sus vejolašvuohta stevdnet earáid ja gáibidit sin geahpedit, čilgii Stein Erik Jahr Dahl.
Ráđđehusadvokáhtta maid oaivvilda ahte Jovsset Ánte Sara lea posišuneren nu go earát orohagas, go lea lasihan boazologu vaikko leamašan geahpedanmearrádus.
Unohas
Jovsset Ánte Sara lohká unohassan gullat ráđđehusadvokáhta čuoččuhusaid.
– Lea nu unohas gullat, logai son oanehaččat bottus.
Stáhta advokáhta Stein Erik Jahr Dahl, gáibidii iežas loahpaheamis ahte Stáhta áššehuvvá ja máksá áššegoluid sihke diggegotti ja lágamánnerievtti diggevuoruid ovddas.
