Aili Keskitalo oaivvilda ahte stáhta ii daga doarvái suodjalit boazodoalu areálaid.
– Váilevaš areálasuodjaleapmi lea várra váldováttisvuohta, dadjá son.
– Dál, go čohkkán dás ja gulan ákkaid, de lea oalle čalbmáičuohcci ahte mearriduvvon boazologu vuođđun leat areálat. Jus lea nu ahte stáhta ii suddje boazodoalloareálaid, de leat agibeaivvi dakkár dilis ahte stáhta oaivvilda ahte leat beare ollu bohccot, dadjá Aili Keskitalo.
Ovdeš sámediggepresideanta ja Norgga Sámiid Riikkasearvvi (NSR) parlamentáralaš jođiheaddji Aili Keskitalo vuoruhii odne čuovvot nuorra boazosápmelačča dikki Hålogalándda Lágemannerievttis Romssas.
– Dán háve deaivvai nu leat ahte lean Romssas, ja guđđen odne stuorra davviguovlokonferánssa «Arctic Frontiers» čuovvon dihtii dikki. Mu mielas lea dehálaš ja gelddolaš gullat lagabui dán ášši ákkastemiid ja vuođu. Lea gelddolaš ášši sihke vuoigatvuođaid dáfus ja maiddái politihkalaččat go lea boazodoalloláhka mii lea ášši vuođđun, lohká Aili Keskitalo.
Ovdamearka
Sámediggi leamašan kritihkalaš dalle go ođđa boazodoalloláhka mearriduvvui ja ovtta siva dasa lohká Keskitalo leat váikkuhusaid nuorra boazodolliide geat leat álggaheamen hukset boahtteáiggi ealáhussii jus šaddet dan dillái ahte fertejit geahpidit ealuideaset.
– Dát ášši sáhttá leat hui buore ovdamearka boazodoallolága váikkuhusaide, ja Sámediggi lea hui garrasit ákkastan ahte boazologu heiveheamis dahje geahpedeamis leat stuorra váikkuhusat servodahkii ja eaŋkilolbmuid, oaivvilda Aili Keskitalo.
Rámida Sara
Su mielas lea buorre go Jovsset Ánte Sara geahččala ášši diggevuogádagas.
– Mun rámidan su ja NSR lea maiddái ruđalaččat dorjon su. Mun doarjjun nuorra albmá gii geahččala iežas birgema gádjut, lohká Aili Keskitalo.
Buorre go čuvvot
Jovsset Ánte Sara lea movttet go nu ollugat leat vuoruhan boahtit diggevistái. Su advokáhtta, Trond Biti, ii loga smiehttan olbmuid birra geat čuvvot dikki.
– Lea buorre go Aili ja earát leat vuoruhan čuovvut ášši odne, muhto livččii vel buoret jus čuvvot buot beivviid. De oažžu buot beliid mielde, lohká Sara.
Ii kommentere ášši
Stáhtaadvokáhtta Stein Erik Jahr Dahl ii hálit kommenteret ášši dan botta go ášši lea diggevuogádaga meannudeamis.
