Odne iđitdiimmuin ledje olbmot diggelanja dievva geat čuvvo Jovsset Ánte Sara ášši Hålogalándda Lágamánnerievttis. Ledje erenomáš ollu nuorat go skuvlaluohkká maid lei vuoruhan čuovvut dikki iđitdiimmuin.
Kongsbakken joatkkaskuvlla servodatfága oahpaheaddji Audun Mathisen lei ožžon cavgileami ahte boazolohkoášši lea dál diggevuogádagas ja sis lea leamašan aiddo stáhta hálddašeapmi ja Sámediggi fáddán.
‑ Heivii bures čuovvut ášši go guoská álgoálbmotfáddái mii mis leamašan, dadjá oahpaheaddji Audun Mathisen.
Eai váldán beali
Oahpaheaddji deattuha ahte sii eai leat váldán beali áššis, čuvvo dušše vásáhusa dihtii.
– Orru ahte oahppi mielas lei gelddolaš, muhto eai lean ráhkkanan man ollu áiggi váldá. Lei vásáhus mii lea dehálaš, lohká oahpaheaddji. Skuvlaluohkká guđii dikki maŋŋá go Jovsset Ánte Sara lei geargan iežas čilgehusain.
Ollugat čuvvot ain dikki
Muđuid leat Sámi nuorat, Norgga Boazosápmelaččaid Riikkasearvi ja eará berošteaddjit čuovvumin dikki.
