Vibeke Larsen muitala ožžon fálaldagaid sihke Olgežis ja Árjjas, iige leat hilgon goappáge vuos.
Mannan vahkkoloahpa mearridii Bargiidbellodaga nominašuvdnačoahkkin ahte sin presideantaevttohus boahtte sámediggeválggain galgá leat Ronny Wilhelmsen.
Vibeke Larsen oinnii dan eahpeluohttámušcealkámuššan iežas vuostá, ja son geassádii Bargiidbellodagas.
Sorjjasmeahttun
Go Vibeke Larsen lea sorjjasmeahttun presideanta, mearkkaša ahte son ii gula makkár ge bellodahkii.
– Dat mearkkaša ahte nu movt dál lea dilli, de in searvva mun boahtte čavčča sámediggeválggaide Bargiidbellodaga ovddas, lohká Larsen.
Son lea geassádan Bargiidbellodagas.
Ožžon fálaldagaid
Larsen lohká ožžon fálaldagaid eará listtuide searvat, muhto ii leat vástidan vel maide fálaldagaide.
– Lean ožžon fálaldaga Árjjas, Olgežis ja maid eará bellodagain, ja mun lean árvvoštallame fálaldagaid, lohká son.
Vibeke Larsen ii hálit nu justa muitalit makkár fálaldagain lea sáhka.
– Lean ožžon fálaldaga čuožžut listtus. Bođii diehtu ahte háliidit mu sin listui, ja ahte munnje lea sadji bellodagain.
Son ii leat vuos mearridan joatká go politihkas čakčii, lohká ahte ferte vuos jurddašit.
– Ovddemus ferte jaskkodit veaháš ovdal go sáhtán dan vástidit, lohká Larsen, guhte mieđiha ahte lea leamaš oalle olu daid maŋemuš beivviid.
Joatká presideantan
– Mun lean fárrolaga ovttasbargoguimmiiguin ráđis gávnnahan ahte joatkkán presideantan. Ovttasbargoguoimmit leat ovttaoaivilis, dievasčoahkkin lea válljen mu presideantan ii ge Bargiidbellodat.
Larsen lea hui oadjebas presideantastuolus, ii ge bala ráđi su hilgumis. Larsen lohká sis lea buorre oktavuohta leamaš dán áššis.
– Sii eai hálit mu molsut eret, eai ge hálit eará presideantta boahtit sádjái Bargiidbellodagas, lohká Vibeke Larsen Ávvirii.
– Doarju go Bargiidbellodat du presideantan?
– Dan gal in dieđe, in leat ožžon makkár ge dieđu dan birra. Jus eai daga dan, de fertejit ovddidit eahpeluohttámuša, vástida sámediggepresideanta.
