Jovsset Ánte Sara dáistaleapmi Stáhta vuostá boazologuid birra lea boktán fuomášumi maiddái olggobeale Norgga. Ruoŧa sámediggebellodat Guovssonásti, čájeha maid dál doarjaga.
– Guovssonásti olles váimmuin doarju Jovsset Ánte Sara, čállá bellodaga jođiheaddji Lars Miguel Utsi preassadieđáhusastis.
– Su vuoigatvuohta áitojuvvo
Preassadieáhusas čilge Guovssonásti oanehaččat ášši duogáža, nammalassii ahte 2014 mearriduvvui Stáhta bealis ahte Jovsset Ánte Saras eai galgga eambbo go 75 heakka.
Dán ii dohkkehan Sara guhte stevdnii stáhta go oaivvildii ahte dieinna boazologuin son gal koŋkána, sii deaivvadedje Sis-Finnmárkku diggegottis gos diggi doarjjui Sara.
Stáhta goittotge guoddalii ášši, danne deaivvada ge Sara fas Stáhtain, dán vuoru ges Hålogalándda lágamánnerievttis.
– Nu mo boazodoallonjuolggadusat dál leat Norgga bealde, de mearkkaša nie stuorra bággonjuovvan dan ahte Sara áiggi mielde šaddá heaitit boazodoalus. Nuorra boazodoallis leat stuorra hástalusat. Lassin ruđalaš riskii, de lea Sara dál dakkár dilis gos su vuoigatvuohta bargat boazodoaluin, áitojuvvo, čállá Utsi.
– Nuorain galgá boahtteáiggedoaivva
Guovssonásttis oaivvildit áššis leat maiddái čiekŋalat čuolmmaid, mat gusket eiseválddiid boazologugeahpedan politihkkii.
Lea moitojuvvon ahte politihkka lea hábmejuvvon unnán boazodoalomáhttu ja -ipmárdusa vuođul, ja ahte dat čađahuvvo almmá boazodolliid ja sin servviid dohkkeheami haga, čállá bellodat.
Guovssonásti bargá dan ala ahte davviriikkalaš stáhtat galget čuovvut álgoálbmotrievtti.
Sii rahčet sámiid iešmearrideami ovddas ja daid vuoigatvuođaid ovddas ahte doaibmat kultuvrras ja ealáhusain.
– Mii soahtat dan ovddas ahte nuorra sápmelaččat galget beassat oahppat, ovdánit ja bargat iežaset kultuvrras ja ealáhusain. Mii soahtat dan ovddas ahte nuorra boazodolliin galge leat nana boahtteáigedoaivva ja oadjebasvuohta, čállá Utsi.
