Almmuhus

Almmuhus

Guovdageainnu searvvit ožžot measta miljovnna ruvnno dál

Guovdageainnus leat ollu tihppejeaddjit geat dorjot servviid go tihppejit. Čájáhusgovva. Govven: Heiko Junge / Scanpix

Dat ii soaitte ártet go duollet dálle goaikkeha miljovdnavuoitu muhtin guovdageaidnulažžii. Norsk Tipping lea almmuhan listtu mii čájeha man ollu Grasrotandel-ruđaid searvvit ožžot mat leat dieđihan mielde dasa.

Almmuhuvvuon: 
Duorastat, 5 Ođđajagimánu, 2017 - 15:13
Ođastuvvon: 
Ođastuvvon: 06.01.2017 - 09:08
Fáddásánit: 

Muhtimat besset illudat eanet go earát.

Valáštallansearvvit leat sii geat orrot oažžume buot eanemus Grasrot-ruđain, sihke Guovdageainnus, Kárášjogas, Porsáŋggus ja Deanus leat valáštallansearvvit mat ožžot buot eanemus ruđa.

 

Guovdageidnui buot eanemus

Dat searvvit mat leat mielde Grasrotandelenis Guovdageainnus ožžot 972 561 ruvnno konttuide.

Guovdageainnus leat 1047 tihppejeaddji geat leat mielde Grasrotandelenis.

Guovdageainnu Valáštallansearvi beassá eanemus illudit 322 834 ruvnnuin go Norsk Tipping máksá ruđaid kontui dáid beivviid.

Valáštallansearvvis leat 298 tihppejeaddji geat addet 5 proseantta tihppenruđas valáštallansearvái.

 

Searvvit mat ožžot eanemus ruđa lagamus sámi suohkaniin

Porsáŋggu Valáštallansearvi oažžu 100 726 ruvnno, ja sis leat 204 tihppejeaddjit geat “addet” ruđa go tihppejit.

Kárášjogas leat 781 spealli mielde Grasrotandelenis, ja buot searvvit Kárášjogas ožžot 461 131 ruvnno. Nordlys IL lea searvi mii oažžu eanemus Kárášjogas, namalassi 75 098 ruvnno.

Deanu Heaibunsearvvis leat 78 tihppejeaddji geaid tihppenruhta manna heaibuide. Sii ožžot 50 206 ruvnno.

Geahča dás man ollu iešguđet searvi oažžu tihppenruđas.

 

Lassánan badjel beliin

Go álggahedje Grasrotandelen, de juolludedje 210,9 miljovnna ruvnno servviide Norggas.

Dađistaga leat eanet searvvit dieđihan mielde Grasrotandelenii, ja eambbo tihppejeaddjit leat maid válljen searvvi masa sin oassi tihppenruđain galgá mannat.

Jagi 2015 juolludedje 448 miljovnna ruvnno servviide. Searvi mii oažžu buot eanemus tihppenruđain lea Vålerenga Spábbačiekčansearvi mii oažžu badjel golbma miljovnna ruvnno.

Leat badjel miljovnna olbmo geat Grasrotandelen bokte juolludit ruđa.

Norsk Tipping muitala ahte Norggas leat birrasii guokte miljovnna tihppejeaddji, nu ahte lea vejolaš ahte searvvit sáhttet oažžut vel eanet dietnasa Grasrotandelenis.

Grasrotandelen guoská buot Norsk Tipping spealuide, Flaxa spealuide ja Belago. Speallamis manná vihtta proseantta ruđas searvái man juohkehaš vállje doarjut.

 

Ovdasiiddus dál