Maŋŋil go Bargiidbellodaga liige sámepolitihkalaš konferánsa odne válljii Ronny Wilhelmsena iežaset presideantaevttohassan sámedikkeválggaide, lea Vibeke Larsen dieđihan ahte son geassáda sámediggepresideantan.
Odne doalai Bargiidbellodat (Bb) liige sámepolitihkalaš konferánssa gos ođđasit válljejedje bellodahkii presideantaevttohasa ja várrepresideantaevttohasa.
Bellodat válljii Ronny Wilhelmsena presideantaevttohassan ja Elisabeth Erke ges várrepresideantaevttohassan, čállá Ságat. (Liŋka lea máksinmuvrra duohken)
Dramatihkka
Dakka maŋŋil dieđihii sámediggepresideanta Vibeke Larsen ahte geassáda sámediggepresideantan.
– In sáhte joatkit go ná čielgasit lea čájehuvvon ahte ii leat luohttámuš munnje, dalle lea lunddolaš váikkuhus geassádit. Dan dagan dievasčoahkkimis njukčamánus, lohká son Ságahii.
Son lohká iežas maid geassádit válgalisttus.
Vibeke Larsen ii leat doaibman sámediggepresideantan eará go birrasiid mánu.
Juovlamánus ovddidii sámedikki eanetlohku eahpeluohttámuša NSR sámediggeráđđái, nu šattai ovddit presideanta Aili Keskitalo geassádit.
Su sadjái válljejuvvui Vibeke Larsen presideantan ja Bargiidbellodat ásahii ođđa sámediggeráđi, ovttasráđiid Árjjain ja Olgežiin.
Ráđis leat dál presideanta Vibeke Larsen (Bb), várrepresideanta Ronny Wilhelmsen (Bb), Mariann Wollmann Magga (Bb), Inger Eline Eriksen (Árja) ja Lars Filip Paulsen (Olgeš).
Pedersen geassádii
Maŋŋil go Bb válddii badjelasas sámedikki ráđđema, de dieđihii bellodaga dalá presideantaevttohas Helga Pedersen, ahte son geassáda evttohassan.
Sivvan dasa lei go son ii lean mielas dasa ahte Bb galggai ovddidit eahpeluohttámuša NSR:ii, dan lei ovddidan maiddái Bargiidbellodaga sámediggejovkui.
Dat eai váldán su vuhtii ja danne logai fertet geassádit, go dovddai dan eahpeluohttámuššan iežas vuostá.
Danne doalai ge bellodat odne liige sámepolitihkalaš konferánssa, válljen dihtii ođđa presideanta- ja várrepresideantaevttohasaid boahtte válggaide.
