Nuorra boazodoalli lea golbma beaivve bealuštan iežas vuoigatvuođaid Hålogalánda lágamánnerievttis, su advokáhta gáibida ahte guoddaleapmi hilgojuvvo.
Jovsset Ánte Sara advokáhta Trond Biti lea iežas prosederemis čujuhan ollu Sis-Finnmárkku diggedupmui.
Duomus daddjo ovttajienalaččat ahte 75:ain heakkain ii leat vejolaš birget boazodoalus, ja danne rihkku stáht mearrádus riikkaidgaskasaš olmmošvuoigatvuođaid.
Stáhta guoddalii duomu ja ášši lea gieđahallon golbma beaivve Hålogalánda lágamánnerievttis.
– Mii gáibidat guoddalanášši hilgojuvvot, lohká Trond Biti Ávvirii.
Jus stáhta vuoitá
Jovsset Ánte Saras lea otne birrasii 350 bohcco ja jus stáhta vuoitá de ferte son geahpedit 75 heggii.
Stáhta advokáhta Stein Erik Jahr Dahl gáibidii ahte stáhta áššehuvvá, mearrádus doalahuvvo ja stáhta ahte máksá áššegoluid sihke diggegotti ja lágamánnerievtti diggevuoruid ovddas.
Guoddala muhto sávvá vuoittit
Jovsset Ánte Sara lohká iežas gearggus guoddalit duomu jus vuoittáhallá lágamánnerievttis.
– Lean gearggus guoddalit, muhto doaivvun ja sávan ahte lágamánneriekti hilgu stáhta guoddaleame, lohká Jovsset Ánte Sara.
Duopmu celko njeallje vahkku siskkobealde.
