Kárášjohkalaš lea dubmejuvvon verrošan alcces 246 245 kruvnna NAV oadjoruđain.
Ovttajienalaš Sis-Finnmárkku diggegoddi lea cealkán duomu ja lea dubmen su 90 diimmu servodatráŋggáštussii mii galgá čađahuvvot 120 beaivvis.
Son dubmejuvvui maiddái máksit 1000 kruvnno ovddas áššegoluid.
Son ii mieđihan dikkis lea sivalažžan ja čuoččuhii dikkis rivttes láhkai deavdán NAV dieđihanskovi.
Ožžon máksot 246 245 kruvnna
Kárášjohkalaš lei áššáskuhtton go galgá leat verrošan NAV oadjoruđain maid oaččui NAV:s.
Son lea NAV:s ožžon máksot 246 245 kruvnna badjelaš beannot jagis, vaikko lea leamašan barggus seamma áigodagas, ii ge dalle leat leamaš riekti ruđaide.
NAV lea doallan čoahkkima suinna, muhto lea dattetge joatkán váilevašdieđihemiin elektrovnnalaš dieđihankoarttas, das man galle diimmu son lea leamaš barggus, čuožžu áššáskuhttimis.
