Odne lea Jovsset Ánte Sara addán iežas čilgehusa, ja fáddán, erenomážit stáhta gažadeamis, lei boazolohku ja njuovvandeattut.
Stáhtaadvokáhtta Stein Erik Jahr Dahl háliidii earret eará diehtit man ollu bohccuiguin oaivvilda Jovsset Ánte Sara iežas birget nu ahte boazodoallu lea váldoealáhus.
Dasa ii lean Jovsset Ánte Saras čielga vástádus.
– In dieđe, lean veaháš eahpesihkar. Ferte aŋkke leat dan mađe ollu ahte gokčá goluid, vástida son. Stáhtaadvokáhtta ii vuollán ja lohká ahte nu guhká go Sara leamašan ealáhusas, ii go de leat makkárge vástádus man ollu bohccuid oaivvilda son dárbbašit vai birge. Dasa vástida son:
– Jus mus livčče 150 bohcco de birgešin buorebut go 75 bohccuin, vástida son gažaldahkii.
Ii oaččo doarjaga
Bođii ovdan dikkis ahte Jovsset Ánte Saras leat sullii gaskal 300- 350 bohcco, stáhtaadvokáhtta jearralii ii go dieđe birge go dálá loguin.
– Mun in oaččo makkárge doarjaga, inge boraspirebuhtadusa ja seammás manná ollu áigi, vástidii Sara.
Bijai vuođđun 350 heakka
Stein Erik Jahr Dahl logai dikkis bidjat vuođđun ahte 350 heakka lea lohku mas Jovsset Ánte Sara háliida leat.
Biehttala posišuneren
Jovsset Ánte Sara ii loga iežas posišuneren, muhto deattuha ahte son lea álggahan nu go árbevierru lea boazodoalus.
Jovsset Ánte Sara lea dál geargan addemis iežas čilgehusa dikkis.
