Boazopolitiijat leat duoguštan máŋga giehtavearjju Sis-Finnmárkkus, olbmuin geain ii leat lohpi atnit giehtavearjjuid. Vearjjut eai lean registrerejuvvon ge.
Boazopolitiijat leat duoguštan máŋga giehtavearjju Sis-Finnmárkkus, olbmuin geain ii leat lohpi atnit giehtavearjjuid. Vearjjut eai lean registrerejuvvon ge.
Boazopolitiijat válljejedje cavgilemiid vuođul burgit máŋga ássanbáikki mat gullet guovtti olbmui, čállet Boazopolitiijat preassadieđáhusas.
Boazodollui gullevašvuohta
Preassadieđáhusas eai almmut goas dát lea dáhpáhuvvan.
– Mii atnit ášši dehálažžan. Registreretkeahttá giehtavearju lea duođalaš vearjoláhkarihkkun, ja mii vuoruhat ášši garrasit. Mii áigut ain gažadit guoskevaš olbmuid ja vihtaniid, lohká Boazopolitiijaid jođiheaddji Inger Anita Øvregård.
Vuoruhit vearjoáššiid
Finnmárkku politiijat atnet guovddážis dárkkistit ahte vearjolága njuolggadusat čuvvojuvvojit.
Boazopolitiijat leat máŋga jagi erenoamážit bargan vearjoáššiiguin ja maiddái árvvoštallan leat go boazodoallit doarvái skihkalaččat vearjjuid doallat.
– Mii oaivvildat dán sáhttit leat mielde eastadeames áitagiid ja veahkaválddálašvuođa ealáhusas ja maiddái geahpedit riidduid, lohká Øvregård.
Gieskat čálii Ávvir áššiid «Boazodoalu árgabeaivvi» dutkamuša birra, mas earret eará bođii ovdan ahte 48 proseantta lohket iežaset orohagas leat olbmot geat láhttejit nihtástallan ládje.
Sii geat raporterejit ahte leat olbmot geat áitet orohagas, raporterejit maid ahte lea dávjjit hušša ja eai loavtte nu bures.
