-Almmuhus-
-Almmuhus-
-Almmuhus-
OĐĐASATVeahkaváldi ja illásteamit bávččagahttet buot agiin

Veahkaváldi ja illásteamit bávččagahttet buot agiin

-

-

Golggotmánu vuosttaš beaivvi lea ON vuorrasiid beaivi ja Finnmárkku politiijat čalmmustahttet veahkaválddi ja illásteami maid vuorrasat šaddet vásihit.

Riskajoavkkut:

Vuorrasat geain orrot rávis mánát ruovttus, geain leat gárrenmirkováttisvuođat dahje eará silolaš váttut.

 

Náittospárat geain okta dahje goappašagat buohcagoahtiba senil demeanssain dahje eará duođalaš dávddaiguin.

 

Vuorrasat geain lea stuorra fuolladárbu muhto unnán veahkit.

Vuoras olbmot vásihit maid veahkaválddit, áitagiid ja bággemiid lagas olbmuin, seamma ládje go mánát, nuorat ja ollesolbmot.

Illásteamit sáhttet leat rumašlaččat, silolaččat, seksualálaččat, ruđalaččat dahje go eai fuolahuvvo dohkálaččat.

 

30 ášši dutkan 2016:s

– Dušše dán maŋimuš jagi leat dutkan ja fuomášan 30 ášši main vuorrasat olbmot leat gillán veahkaválddi dahje áitagiid. Viđa áššis ledje dagut dahkkon lagas olbmuiguin, čállá bearašveahkaváldeáššiid koordináhtor Lilja Skljarova Hansen preassadieđáhusastis.

Finnmárkku statistihkat maid čájehit ahte sihke almmáiolbmot ja nissonolbmot šaddet dáid gillát, ja dávjjimusat fallehuvvojit sii geat leat gaskkal 70 ja 79 jagi boarrásat.

 

Riskamearkkat:

Dávjá gahččá, muhto gahččama čilgehus ja váddu eaba heive oktii. 

 

Čilgehusat rievddadit, geahppu, skurtnjaga, ballagoahtá, oađđinváttisvuođat dahje eará mearkkat mat čájehit dorvvuhisvuođa.

Váttis fuomášit go eai muital

– Dákkár rihkusáššiid lea váttis fuomášit go dávjá vuorasolbmot eai hálit hállat dan birra. Olusat leat bajásšaddan jávohisvuođain bearašveahkaválddi birra. Mo jus leat sin iežaset ráhkis mánát dahje mánáidmánát geat leat veahkaválddálaččat dahje geat áitet? Olusat eai háliidivčče váidit iežaset mánáid dahje mánáidmánáid. Dat vásihuvvo hirbmat bahčagin ja máŋggas maid ballet šaddat eambbo leat okto jus muitalit veahkaválddi birra, muitala Hansen.

 

Politiijat dávjá vásihit ahte vuorrasat eai hálit váidit áššiid, eai ge oaivvil iežaset leat gillájeaddjit.

– Muhto gávdnojit vuogit maiguin beassá eret dorvvuhisvuođas, ja politiijat sáhttet veahkehit. Buohkat galget dovdat iežaset oadjebassan, buohkain lea riekti oadjebas árgabeaivái ja leat oadjebassan boarásmanbeivviid, čállá Hansen.

Veahkaváldi hedjonahttá eallinkvalitehta ja váikkuha dearvvašvuhtii. Vuorrasiin geat ellet dorvvuhisvuođas, lea stuorát várra jápmit nuorabun go sii geat eai vásit illástemiid.

(Ášši joatká gova vuolábealde)


GEARGGUS DUSTET: Finnmárkku politiijaguovllu bearašveahkaváldeáššiid koordináhtor Lilja Skljarova Hansen dáhttu olbmuid cavgilit politiijaide jus dihtet olbmuid birra geat vásihit veahkaválddi.
Vuorkágovva: Berit Marie Lise Eira

70 proseantta áššiin heaittihuvvojit

Statistihkka čájeha ahte 70 proseantta áššiin heaittihuvvojit.

– Dát dagaha ahte mun jurddašan lea go váidin ja ráŋggášteapmi áidna rivttes vuohki? Mun oaivvildan ahte gávdnojit maid eará čovdosat mat bággejit iešguđet etáhtaid ovttasbargat dákkár áššiin. Man čeahpit leat mii ovttasbargat? Veahkaválddi eastadeapmi lea servodatovddasvástádus ja jus báikkálaččat ii leat lagas ovttasbargu de eat olat mihtuid, lohká Hansen.

 

Váldde oktavuođa politiijaiguin jus dieđát ovttage birra guhte vásiha veahkaválddit.

– Lassin dutkamiidda, sáhttet politiijat neavvut ja bagadit, ja maiddái veahkehit olbmuid boahtit rivttes aktevrra ságaide gielddalaš dásis, lohká Lilja Skljarova Hansen.

Vern for eldre neahttasiiddus gávnnat maid eambbo dieđuid.

 

 

 

-Almmuhus-