Tromssa ja Finnmárkku vuosttašadvokáhtta áiggošii ođđasit gažadit ovtta vihtana 1998 Vuotnasiida-goddináššis.
Tromssa ja Finnmárkku vuosttašadvokáhtta áiggošii ođđasit gažadit ovtta vihtana 1998 Vuotnasiida-goddináššis.
Dás lea sáhka ovtta olgoriikkalaš stáhtalahttus, guhte gažaduvvui veahá maŋŋil go Marie-Louise Bendiktsen (59) gávdnui čukkohallan jámas 1998 iežas ruovttus Vuotnasiiddas Siellagis.
Almmái lei jávkan, ii ge lean fáhtemis ságaide šat jagi maŋŋil go politiijat fas áigo su gažadit, čállá Nordlys.
Politiijat ohcaledje Interpol bokte
Norgga politiijat ohcaledje albmá Interpol bokte, easka 2010:s oaččui Kripos dieđu duiskka politiijain ahte almmái 2002:s dubmehalai gávcci jahkái giddagassii, go niibbiin lei geahččalan goddit muhtin nissona ja albmá nuortan Duiskkas.
Son čohkkái giddagasas 2001 gitta 2009 rádjai, muhto lei sáddejuvvon olggos Duiskkas ja ruovttoluotta iežas ruovtturiikii go Kripos oaččui dieđu dás.
– Duiska-luotta fertet guorahallat. Muhto dat ferte dahkkot ávžžuheami bokte maid diggi sádde duiska eiseválddiide rivttes kanálaid bokte. Dan maŋŋil leaš oaidnit leago dien bealis mihkkege maid čuovvolat, lohká vuosttašadvokáhtta Lars Fause.
Háliidivčče háleštit vihtana oahppásiiguin
Vuotnasiidda-goddinášši dutkan heaittihuvvui virggálaččat 2003:s. Reivves Riikkaadvokáhtii dalle goittot čállui ahte heaittiheapmi ii mearkkaš ahte ášši oalát ráddjo eret, go lei menddo duođalaš ášši.
Siellaga leansmánni Hans Roar Rasmussen lohká ahte nisu gean ohcaluvvon dievdu čuggii Duiskkas, lei albmái lagas olmmoš.
– Politiijat leat beroštuvvan háleštit olbmuiguin geat leat oahppásat dán albmái. Mii háliidivččiimet diehtit eanemus lági mielde dán vihtana birra, gii son lei, maid lea lohkan ja bargan, gávnnahan dihte ahte lea go jierpmálaš čuovvolit dán luotta vai ii, lohká Rasmussen.
(©NTB)
