Dievddu guoktá advokáhtat muitaleaba ahte soai leaba lihkolaččat ja dovdaba geahpádussan Sis-Finnmárkku diggegotti duomu mii otne celkui.
Dievddu guoktá advokáhtat muitaleaba ahte soai leaba lihkolaččat ja dovdaba geahpádussan Sis-Finnmárkku diggegotti duomu mii otne celkui.
Otne diibmu 12:s almmuhuvvui duopmu áššis mas guokte boazosápmelačča leigga áššáskuhtton rievdadan mearkkaid, verrošan boraspirebuhtadusaiguin ja biinnidan bohccuid muhtinlágán reaidduin. Diggi lea áššehuhttán sudno buot čuoggáin. Nuorat dievddu advokáhta Kjetil Nilsen ii loga dievddu hirpmástuvvan, muhto nu mo buot áššiin, de lea olmmoš veaháš eahpádusas ovdal duopmu celko.
– Son dovdá iežas nama dál buhtistuvvon, lea ovttajienalaš duopmu ja ášši lea vuđolaččat gieđahallon , lohká Nilsen ja sávvá áššáskuhtti eiseválddit dohkkehit duomu.
Guhkkin eret dubmet sudno
Sis-Finnmárkku diggegoddi lei ovttajienalaš ja duopmu lea 59 siiddu. Kjetil Nilsen lohká ášši lea čuohcan garrasit su klientii ja leamašan váibadahtti.
– Son dovdá iežas oaguhuvvon guhkkit áigge, ja leamašan ollu ságat mat eai leamašan duođat. Nu ii leat eahpádusas ahte leamašan lossa dilli. Dan sivas lea illudahtti oažžut dán dieđu otne. Go lea beassan friddjan buot čuoggáin, maiddái buhtadusmáksimis, de čájehuvvo diggegoddi leamašan guhkkin eret dubmet sudno ráŋggáštanduomus, čilge Nilsen ja lasiha buhtadusduomus lea duođaštus gáibádus unnit go ráŋggáštanduomuin.
Vuđolaš duopmu
Boarrásat dievddu advokáhta Hjallis Bakke lohká duopmu lei nu go soai dievdduin leigga vuordán, muhto lei hui illudahtti oažžut bohtosa.
–Lea ovttajienalaš ja vuđolaš duopmu. Lei nu go mun lean čađat oaivvildan, ahte áššáskuhtti eiseválddis eai lean doarvái buori duođaštusat ja diggi lea ovttaoaivilis bealušteddjiiguin deháleamos čuoggáin. Diggi cuiggoda maiddái politiijaid barggu, ahte eai leat doarvái bures dutkan ášši, lohká Bakke guhte deattuha ahte su klieanta lea hui ilus dál.
