Nordlándda politiijat leat álgán dutkat 31 ášši rohcošemiid oktavuođas mat galget dáhpáhuvvan Divttasvuonas, čállá VG.
Nordlándda politiijat leat álgán dutkat 31 ášši rohcošemiid oktavuođas mat galget dáhpáhuvvan Divttasvuonas, čállá VG.
– Buot dát áššit leat váidon politiijaide dán jagi. Mii soaitit maid cegget vel eanet áššiid, dieđiha politiijaadvokáhtta Jorild Steindal VGii.
Sihke mánát ja rávisolbmot
Geassemánu dán jagi muitaledje 11 nissonolbmo ja dievdoolbmo VG aviisii rohcošemiid birra. Dain 31 áššiin maid dál dutket, lea sáhka mánáid ja rávisolbmuid veagalváldimiid birra, seksualálaš servvoštallan mánáiguin geat leat vuollel 14 jahkásaččat, ja seksuála rohcošeapmi mii lea dáhpáhuvvan go lea ávkkuhan iežas virggi dahje luohttevašvuođain.
Dán rádjái leat birrasiid 20 gillájeaddji ja 25 vearredahkki, dieđihit politiijat. Politiijat eai leat vel dutkagoahtán čuoččuhuvvon vearredahkkiid, ja dutkama lohket viiddisin.
Váidimat lassánan
Aviissa dieđuid mielde leat muhtin áššit dáhpáhuvvan hui áigá. Boarrásepmosat muitalit dáhpáhusaid birra mat ledje 50 loguin. Leat maid čuoččuhuvvon dáhpáhusat mat galget dán jagi dáhpáhuvvan.
Suoidnemánus bođii ovdan ahte politiijat leat álgán dutkat 17 ášši main 12 áššiin čuoččuhuvvojit rohcošeamit, njeallje áitinreivvet, ja okta váidda Lestadiánalaš čoahkkaneapmái Divttasvuonas.
Borgemánus ledje 22 ášši váidon politiijaide. (©NTB)
