Heahteguovddáščállingoddi oaivvilda Finnmárkku politiijaid dahkan roavva bálvalusrihkkuma goddimiid oktavuođas Girkonjárggas. Báikkálaš politiijabálvalus árvvoštallá sihtat politiijaáššiid erenoamášossodaga geahččat ášši.
Heahteguovddáščállingoddi oaivvilda Finnmárkku politiijaid dahkan roavva bálvalusrihkkuma goddimiid oktavuođas Girkonjárggas. Báikkálaš politiijabálvalus árvvoštallá sihtat politiijaáššiid erenoamášossodaga geahččat ášši.
Heahteguovddáščállingoddi moaitá go Girkonjárgga politiijat eai váldán atnui SARA reaiddu (Spousal Assault Assessment Guide), dahje eai árvvoštallan váidit ášši ieža, go Pimsiri Songngam (37) lei váldán oktavuođa politiijain mannan vahkku. Reaidu geavahuvvo go galget árvvoštallát vára guoibmegoddimii, ja buot Norgga politiijaguovllut galget geavahit dan reaiddu.
Songngam ja su 12-jahkásaš bártnáš gottáhalaiga mánnodaga čuovganeapmái. Songngam isit (59) lea áššáiduhtton goddimis.
Ollu signálat
– Dán áššis ledje ollu várálaš signálat ja de livččiie galgan juoga dahkkot, muitala Heahteguovddáščállingotti beaivválaš jođiheaddji Tove Smaadahl NTB:i.
Son sihtá politiijaáššiid erenoamášossodaga geahččat ášši.
Ieža isket ášši
Finnmárkku politiijaguovllu áššáskuhttinjođiheaddji Morten Daae muitala politiijaguovllu siskkáldasat vuos iskat ášši, ja sii árvvoštallet galgá go Erenoamášossodagain váldit oktavuođa.
– Dat lea vejolaš ahte sii sáhttet geahčadit dán ášši, muhto mii eat leat mearridan dahkat dan vuos, muitala son NTBii. (©NTB)
