-Almmuhus-
OĐĐASATHeaittihit 15 operašuvdnaguovddáža

Heaittihit 15 operašuvdnaguovddáža

-

-

Finnmárkkus heaittihuvvo operašuvdnaguovddáš Oarje-Finnmárkkus, vaikko aiddo leat máksán measta guokte miljovnna ruvnno ođasmahttit guovddáža.

Politiijadoaimmaid rievdadeapmi mielddisbuktá ahte 15 operašuvdnaguovddáža heaittihuvvojit miehtá Norgga, vaikko aiddobáliid leat máksán miljovnnaid guovddážiid ođasmahttimii.

Sihke heahteneahtta ja gulahallanfierpmádat leat oassin ođasmahttimis. Oarje-Finnmárkkus lei ođđa heahteneahtta doaimmas golggotmánus.

 

Luoikkahan ruđaid

Politiijaguovlu fertii luoikkahit 1,7 miljovnna ruvnno vai nagodit ođasmahttit rusttegiid, čállá Politiforum.

Guovvamánu rájes galgá heahteneahtta doaibmagoahtit Girkonjárggas ođđa Finnmárkku politiijaguovllus, go Oarje-Finnmárkkus heaittihuvvo operašuvdnaguovddáš.

 

Beare olu golahan

Mussiris leat maid seamma dilis gos leat ođasmahttán rusttegiid miljovnnaid ovddas, mii lea váikkuhan ahte eai leat nagodan doalahit bušeahta, ja lea váikkuhussan eará doaimmaide, čilge hálddahusjođiheaddji Jens Berget.

– Mis ii lean doarvái ruhta oastit vuojániid ja šattaimet golahit ruđaid mat mis eai lean, mii fas dagahii alla goluid 2014:s ja 2015:s.

 

Livččii gártan divrrasin

Eará politiijaguovllut leat maid geavahan ollu ruđaid ođasmahttit operašuvdnaguovddážiid mat dál heaittihuvvojit.

Heahteveahkkedirektoráhtta lohká heahteneahta ođasmahttin mannan máŋggaid jagiid badjel, ii ge leat čuvvon boahttevaš struktuvrra. Livččii gártan divrrasin bissehit prošeavtta mii lea jođus, ja rusttegiid sáhttá sirdit dohko gos lea atnu daidda.(©NTB)

-Almmuhus-