Finnmárkkus leat logi jagis lassánan 286 ođđa bargosaji kulturealáhusas.
Finnmárkkus leat logi jagis lassánan 286 ođđa bargosaji kulturealáhusas.
Jagi 2003 rájes gitta 2014 rádjai lassánedje 286 bargosaji kulturealáhussuorggis Finnmárkkus. Fylkkasátnejođiheaddji Runar Sjåstad lea movttet go nu bures lea mannan.
– Lean duhtavaš, go dat lea 21,5 proseanta ovdáneapmi. Go buohtastahtte oppalaččat, lassánedje bargosajit Finnmárkkus 13 proseanttain, čállá son preassadieđáhusas ja lasiha ahte Finnmárkku fylkkadikki mihttu, oažžut 500 ođđa bargosaji, lei oalle stuora lohku dalle 2003:s.
Lahka Norgga logu
2014 loahpas barge 1618 olbmo Finnmárkkus kulturealáhusain, ja dat lei 4,2 proseanta buot bargoolbmuin olles Finnmárkkus. Dat ii lean ge guhkkin eret našunála logu, go olles riikkas lea lohku vihtta proseanta olles bargoveagas.
Ávki bidjat návccaid
Sjåstad lohká dán čájehit lea ávki atnit návccaid guhkit áigái. Son lohká lassin ollu eará doaimmaid dán áigodagas, lea leamaš ávkin go leat ovttasbargan regionála ovdánahttinprográmma (RUP) oktavuođas.
– Raporta lea miellagiddevaš sihke politihkkariidda ja earáide. Bijaimet olu fuomášumi dán bargui vaikko ássiid mielde lea unna fylkkaš. Lea mearkkašan hui olu, ja min bargu lea ávkkuhan. Muhto gudni gullá maid ovttaskas olbmuide ja kreativa birrasiidda stuorebuš ja smávit báikkiin.
Nu čállá fylkkasátnejođiheaddji Sjåstad preassadieđáhusastis.
Dán raportta lea Kreativ Industri čállán, ja almmuhuvvui fylkkadiggečoahkkimis Álttás.
