-Almmuhus-
-Almmuhus-
-Almmuhus-
OĐĐASATDubmehallan go galgá leat sápmelaččaid vealahan

Dubmehallan go galgá leat sápmelaččaid vealahan

-

-

Muhtin goalmmátlot-jahkásaš almmái lea dubmehallan go galgá leat vealahan sápmelaččaid.

Árabuš geassemánus meannudii Jiellevári diggegoddi ášši mas muhtin johkamohkálaš almmái lei áššáskuhtton go juovlamánus diibmá lei čállán vaššičállosiid sápmelaččaid birra iežas siiddus sosiála mediain.

Čállosat ožžo fuomášumi ja máŋggas vásihedje dáid unohassan, nu váidojedje čállosat. Dál almmái lea dubmehallan dáid ovddas, čállá oddasat.se.

 

Ovdal dubmehallan

Almmái lea ovdalis dubmehallan go lea áitán virgeolbmuid. Boađus dán ođđa duomus lea ahte ovddit dupmui galgá maid dát dáhpáhus gullat. Dasa lassin šaddá almmái máksit 800 ruvnno buhtadussan.

Almmái dubmehalai go galgá leat vealahan álbmotjoavkku. 

Ruoŧas sáhttá dán paragráfa mielde dubmehallat jus olmmoš dieđu bokte, mii juhkkojuvvo, áitá dahje badjelgeahččanvuođa ovddida álbmotjoavkku vuostá ovdamearkka dihte čearddalaš gullevašvuođa dahje liikeivnni vuođul.

 

Rabas profiila

Áššáskuhttin čálii áššáskuhttimis ahte almmái lea: «áitán ja badjelgeahččanvuođa ovddidan sápmelaččaid vuostá Facebookas. Čálus lea leavvan go albmás lei rabas profiila, nu olu eará olbmot besse lohkat čállosiid ja kommenteret daid. Almmái dagai dán iešdáhtus».

 

Ii loga oaivvildan olles čeardda

Almmái lea gažadeamis njukčamánus dovddastan ahte čálii čállosa, muhto čuoččuhii ahte lea čállán dáid fuolastumis, eai dat lean oaivvilduvvon sápmelaččaide čeardan, muhto soapmásiidda geat ledje galledan su dan ija.

Almmái oainnat čuoččuha ahte seamma ija go dieid čálii, de lei doaruhuvvon iežas ruovttus.

Váidagis dattetge bohtet eará bealit ovdan, doppe čuoččuhuvvo ges ahte almmái ieš lei doarrámin muhtin earáin, muhto goalmmát olmmoš gearggai mannat gaskii. Almmái ii lean áššáskuhtton doarruma ovddas.

-Almmuhus-