Almmuhus

Almmuhus

Sirdet Sápmi Pride doaluid Guovdageidnui

Sápmi Pride doalut lágiduvvo diibmá Kárášjogas, dán jagi galge ges Anárii. Guovdageainnu searvegotteráđi mearrádus homofiillaid vihaheami dáfus, lea dagahan ahte sirdet doaluid Guovdageidnui. Priváhtagovva

Maŋimuš áiggiid beaggimat Guovdageainnu searvegotteráđi mearrádusas homofiillaid vihaheami dáfus, leat dagahan ahte Sápmi Pride lea mearridan sirdit dán jagi doaluid Anáris Guovdageidnui.

– Eat leat dušše dan dihte mearridan sirdit go searvegotteráđđi lea mearridan ahte eai suova homofiillaid ja lesbaid náitalit sin girkus, muhto maiddái dat go suohkanbáhppa lea medias cealkán ahte homofiliija lea dakkár mas sáhttá eret beassat, muitala Leammuid Lemet Ánde guhte lea prošeaktajođiheaddji Sápmi Prides.

 

– Dego Iranas boahtán

Altaposten áviisii dat suohkanbáhppa Bjarne Gustad lohká ahte homofiillat fertejit doarrut dovdduid ja suttu vuostá ja ahte biibbala mielde lea suddu jus eallá homofiilan.

– Diet cealkámuš lea dego livččii Iranas boahtán, dat ii gula gosage, lohká Lemet Ánde.

 

Loga maid: – Sávan sin gávdnat čovdosa man mielde homofiillat sáhttet dovdat dohkkehuvvon girkus

 

Son lohká ahte dat cealkámušat mat Guovdageainnu girku bealis leat ovddiduvvon mediaide, orrot čájeheamen ahte Guovdageainnus lea váivi eallit homofiilan dahje lesban. Danne mearridedje sirdit doaluid dohko.

– Jáhkán ahte buot doalut mas homofiillat ja LHBT-olbmot leat guovddážis, veahkehit dákkár áššiid oktavuođas. Dál beassat čájehit min oaiviliid Guovdageainnus. Dát šaddá min vástádussan searvegotteráđđái, ahte dát eai leat dohkálaš oaivilat.

 

Vuordá buoremusa

Diibmá lágidedje Sápmi Pride doaluid Kárášjogas, gos girku ja searvegotteráđđi vuostáiválddii sin ja doalai ipmilbálvalusa dáid doaluid oktavuođas. Lemet Ánde ii leat seamma optimista Guovdageainnu dáfus.

– Háliidan gal vuordit buoremusa buohkain, muhto in jáhke Guovdageainnus šaddat seamma ládje. Jus beassat girkui de gal boahtit gullat, muhto leaš oaidnit mo vuostáiváldet min, jurddaša son.

 

Áigot ovddidit diliset riikkamediaide
Leammuid Lemet Ánde muitala iežaset maid áigut loktet ášši riikkamediaide.

– Go Pride organisašuvnnas lea paradevázzin Oslos, de áigut dán ášši váldit ovdan. Áigut riikkamediaide muitalit makkár dilli mis lea dáppe davvin ja Guovdageainnu searvegotteráđđi sáhttá vuordit reakšuvnnaid dan maŋŋil, lohká son.

 

Sápmi Pride lágiduvvo Guovdageainnus borgemánu 25.-28. beivviid, prográmma ii leat vuos gárvvis.

Ovdasiiddus dál