-Almmuhus-
OĐĐASAT– Oadjoruhtaverrošeaddjit ráŋggáštuvvojit garrasit

– Oadjoruhtaverrošeaddjit ráŋggáštuvvojit garrasit

-

-

Njeallje guovdageaidnulačča šaddet diggái go galget leat verrošan oadjoruđaiguin. NAV Dárkkisteami direktevra Sverre Lindahl lohká dákkár áššiin garra ráŋggáštusaid.

– Mii oaidnit ahte oadjoruđaidverrošanáššiin leat garra ráŋggáštusat. Alimusriekti lea cealkán ahte jus lea verrošan badjel 1G ovddas, mii lea birrasii 90 000 ruvnno, de dat dábálaččat galgá ráŋggáštuvvot giddagasain, čilge direktevra, muhto deattuha ahte vástida obbalaččat. Son ii loga sáhttit kommenteret ovttaskas áššiid mat galget diggái.

 

Galget verrošan oktiibuot 930 000 ovddas

Ikte čálii Ávvir dan birra go Guovdageainnus galget njealjis leat váldon verrošeamis oadjoruđaiguin. Sis-Finnmárkku diggegoddi meannuda dáid áššiid čavčča mielde.

Dat golmmas, geat Guovdageainnus leat váidon, ja geaid áššiid Sis-Finnmárkku diggegoddi meannuda borgemánus, galget guhtege verrošan badjel 100 000 ruvnno ovddas, oktiibuot 931 000 ruvnno ovddas.

Njealját olbmo ášši dáfus ii leat áššáskuhttindiehtu vel addon, danne dat lohku ii leat almmolaš.

 

Dárkkistit

NAV Dárkkisteapmi, mii lea NAV vuogádaga dárkkistanorgána, dat čađaha dárkkistemiid ja guorahallá orrot go olbmot verrošeamen NAV ruđaiguin.

– Mii fuomášat oadjoruhtaverrošemiid dábálaš áššemeannudeami bokte, dahje ovttasráđiid ja cavgilemiid vuođul eará almmolaš etáhtain, dahje cavgilemiid vuođul maid oažžut dábálaš olbmuin ja go buohtastahttit almmolaš registariid, čilge NAV Dárkkisteami direktevra Sverre Lindahl Ávvirii.

 

Loga maid: Njealjis galget leat verrošan oadjoruđaiguin Guovdageainnus

 

Boarráseamos dáhpáhus čieža jagi áigi

Dat áššit mat Guovdageainnus leat váidon, leat oalle boarrásat. Boarráseamos verrošeapmi galgá dáhpáhuvvan 2009:s, čieža jagi dassái. Sverre Lindahl ii loga sáhttit kommenteret ovttaskas áššiid, mat galget diggái ja čilget manne nie guhká leat ádjánan.

– Dás ferten vástidit obbalaččat. Nu guhká go ášši ii leat áiggehuvvan, de sáhttit dan váidit. Muhtin áššit sáhttet bistán guhká. Dasa lassin fertet muhtin áššiid guorahallat hui vuđolaččat ovdal go sáhttit váidit daid, eará áššit ges eai gáibit nu olu guorahallama, čilge son.

 

Geatnegahtton dieđihit

Okta dain, guhte lea áššáskuhtton verrošeami ovddas, oaivvilda ahte dát lea dakkár maid NAV lei galgat ovdal fuomášit.

– Nu mo lohken, de in sáhte kommenteret ovttaskas áššiid mat galget dikki ovdii. Obbalaččat dattetge sáhtán dadjat ahte juohkehaš, guhte oažžu doarjaga, lea geatnegahtton addit rivttes dieđuid NAV:i. Jus rievdá dilli nu ahte sáhttá váikkuhit máksimiidda, ovdamearkka dihtii bargodilli ja dienas rievdá, birgennákca rievdá dahje eará diŋggat dáhpáhuvvet, de lea geatnegahtton dieđihit dan birra, čilge NAV Dárkkisteami direktevra.

 

Ii dieđe mii leaš dábálaš lohku

Guovdageainnu suohkanis eai leat go birrasii 3 000 ássi, muhto Lindahl ii sáhte gal vástidit orru go olu go njealjis galget leat verrošan.

– Mis ii leat gal statistihkka mii čájeha mii lea dábálaš váidinlohku suohkaniid ássanlogu ektui, čilge son.

Riikadásis váidojedje diibmá 1 472 olbmo oadjoruhtaverrošeami ovddas. Gaskamearálaš supmi juohke áššis diibmá, lei 218 000 ruvnnu, muhto supmit rievddadit áššis áššái.

 

-Almmuhus-