Sámediggeráđđi juolluda 100 000 ruvnno sámi dievdduid seksuála rohcošeami diehtojuohkinbargui man Utsattmann organisašuvdna galgá čađahit.
Sámediggeráđđi juolluda 100 000 ruvnno sámi dievdduid seksuála rohcošeami diehtojuohkinbargui man Utsattmann organisašuvdna galgá čađahit.
Utsattmann lea iešheanalaš organisašuvdna mas lea mihttun vuosttaldit seksuála rohcošemiid mánáid vuostá, ja sis lea erenoamáš fokus dievdduide. Dán geasi čađahit sii sierra diehtojuohkinbarggu sámi servvodagas.
– Sámit vásihit dávjjit illastemiid ja rohcošemiid go eará oassi álbmogis, čájeha dutkan mii almmuhuvvui 2015:s. Sámi nissonat leat eanemus uhkiduvvon, muhto sámi dievddut maid lohket eanet uhkiduvvon go dievddut eará oasis álbmogis, muitala Olsen.
Deaivvadeapmi oapmahaččaide
Sámediggeráđđi lea maid juolludan 25 000 ruvnno LEVE Finnmarkii. Sii galget dáinna juolludemiin lágidit deaivvadeami oapmahaččaide geat leat vásihan lagamučča iešsoardima. Deaivvadeapmi lágiduvvo geassemánus ja lea oapmahaččaide Nordlánddas, Romssas ja Finnmárkkus, čállá Sámediggi preassadieđáhusas.
– Lea dehálaš bargu čalmmustahttit dakkár osiid maid birra ii ságastallojuvvo sámi servvodagas, dadjá sámediggeráđđi Henrik Olsen.
