-Almmuhus-
OĐĐASATÁktor gažadii SNO oktavuođaid

Áktor gažadii SNO oktavuođaid

-

-

Gaskavahkku jotkkii boarrásat dievdu addimis iežaset čilgehusa diggái, áktor gažadii su ja manne áššáskuhttima čađa čuoggás čuoggái.

Áktor, Økokrima politiijaadvokáhtta Inge Svae-Grotli, gažadii dievddu, ja dáhtui diehtit áššáskuhtton boarrásat dievddu oktavuođa Stáhta Luonddubearráigeahčuin (SNO) ja ovttain bargiin guhte lea dárkkistan ráppiid maid čuoččuhit dievddu biinnidan muhtunlágan reaidduin oažžun dihtii boraspirebuhtadusa.

SNO bargi lea maiddái vihtan áššis.

– Maŋŋá dán ášši lea šaddan ártegis oaidnu su ektui, in báljo sáhte jáhkkit maid čuoččuha, vástida dievdu áktorii go galgá muitalit su ja SNO bargi oktavuođa.

 

– Maid das oaivvildat, dáhttu áktor diehtit.

– Go ovddida dakkár čuoččuhusa, maŋŋá dan de šattai heajos oaidnu albmá ektui, vástida áššáskuhtton dievdu.

 

Mo rassá go dieđiha ráppiid

Fáddá gaskavahkku dikkis lei maid gos dievddus lea geasse-, čakča- ja dálveorohat, ja gos dievdu láve ealu guođuhit, gos orru, gos leat barttat ja gos leat gárddit. Diggi beasai kártta oaidnit ja dievdu čilgii daid beliid diggái.

Áktor dáhttu viidásat čilgehusa mo lea dieđihan ráppiid ja makkár oktavuohta leamašan SNO:in go lea dieđihan gávdnan ráppiid maid vároha goddon ráfáiduhtton návdái, ja mo lea čállán rábbedieđiheami.

Diggi beassá oaidnit ráppiid govaid maid oaivvildit dievddu iešmielat vahágahttán vai sulastahttá boraspirevahága. Dievdu vuđolaččat muitalii makkár dieđuid láve addit go dieđiha sisa ráppiid.

Ii sáhttán dáhkidit mearkka

Áktor joatká ja čájeha ráppiid govaid mat lea duođaštussan áššis ja jearrá dievddus dovdá go ráppiid.

– Lea borran čoarbbeali ja diet lea borron mihá eambbo. Dies lea visot rabas gilga, vástida son ovtta govvii, Svea-Grotili jearrá de muitala go beallji juoidá.

– Sulastahttá mu mearkka, muhto in sáhte dáhkidit, vástida son ja jearrá áktoris oaidnit nuppi bealji, go govas ii oidno go okta beallji.

Áktoráhtta áigu iskat lea go govva nuppi bealjis, muhto diggi ii beassan oaidnit vel gova das.

 

Čuoččuha ahte leat seamma ráppit

Dievdu joatká kommenteret dáđis govaid maid áktoráhtta čájeha diggái.

– Ollu borron ráppit eai leat dat seamma maid mun lean gávdnan, dan oainnán čielgasit, vástida son maŋŋá go oaidná moadde gova ráppiin mat leat dieđihuvvon sisa dievddu namas.

 

Áktor jearrá manin oaivvilda leat eará ráppit, ja dasa vástida son:

– Dan in gal fuobmá kommenteret manin leat eará ráppiin govain.

 

Áktor loahpahii gažadeami ja dáhtui dievddu čilget su ja nuppi áššáskuhtton dievddu oktavuođa ja čanastagaid. Áššáskuhtton nuorat dievdu galgá bearjadaga addit iežas čilgehusa diggái.

 

 

 

-Almmuhus-