Golmmas dušše johtolatlihkohisvuođain Davvi-Norgga geainnuin njukčamánus.
Golmmas dušše johtolatlihkohisvuođain Davvi-Norgga geainnuin njukčamánus.
Lihkohisvuođat ledjet Nordlánddas, Tromssas ja Finnmárkkus, čállá Stáhta geaidnodoaimmahat preassadieđáhusastis.
Buot golmma davimus fylkkain dušše olbmot
Vuosttaš lihkohisvuohta dáhpáhuvai Báhcavuonas Finnmárkkus, gos muhtin 83 jahkásaš biilavuoddji duššai go vujii muhtin guorbmebiilla njeaiga luoddaearus.
Moadde beaivvi maŋŋil duššai ges muhtin 52 jahkásaš nisu E8 geainnu alde Tromssas. Biila man mielde son lei, beaškkehii oktii muhtin traileriin Hundbergan lahkosis.
Maŋemus jápminlihkohisvuohta dáhpáhuvai ges E6 geainnu alde Sálahis Nordlánddas, gos 38 jahkásaš almmái duššai go biila mainna vujii beaškkehii oktii traileriin.
Unnit go gaskamearri
Dán rádjai leat dán jagi duššan njealji johtolatlihkohisvuođain Davvi-Norggas. Dat lea unnit go diibmá dáid muttuid.
Gaskamearálaččat lea vihtta maŋimus jagiid duššan gaskkal guhtta ja čieža olbmot johtolatlihkohisvuođain Davvi-Norggas, jagi álgo golmma mánus.
