Seksuála illásteapmi lea váikkuhan su eallimii nu sákka ahte válljii rahpasit dán fáttá birra. Video mas dan birra muitala lea juhkkon jo fargga 500 geardde facebookas.
Seksuála illásteapmi lea váikkuhan su eallimii nu sákka ahte válljii rahpasit dán fáttá birra. Video mas dan birra muitala lea juhkkon jo fargga 500 geardde facebookas.
29- jahkásaš Marion Anne Knutsen lea jo geargan eanet váivviid vásihit dán eallimis go maid eatnašat vásihit olles eallinagis. Liikká ii leat dát nieida vuollánan.
Mannan vahkkus searvvai son seminárii man Árran julevsámiguovddáš lágidii. Fáddán semináras lei dáruiduhttin ja dearvvašvuohta ja galggai muitalit massima, bákčasa, doaivaga ja soabadeami birra.
Lossa vásáhusat
Doppe logaldalai ge Marion Anne, ja muitalii iežas eallimis. Son ii lean go gávcce jahkásaš go su unnavieljaš duššai viessobuollimis, ja go lei 21-jahkásaš de heavvanii ges nubbi unnavieljaš. Birrasiid jagi dassái válljii ges su eadni vádjolit eret, ja sorddii iežas.
«– Mun áddejin áigá mánnán jo ahte min ruovttus ii lean nu mo galggašii leat, ahte eatnis ledje váttisvuođat. Bajásšadden etniin mii lei psykalaš buohcci ja jáhkken gitta ollesolbmo ahkái ahte mu vieljažiid jápmimat dat ledje sivvan dasa. Muhto go šadden ollesolmmožin, de muitalii eadni ahte son lei mánnán máŋgii illástuvvon seksuálalaččat»
Marion Anne Knutsen logaldallamis
– Hállamiin jávkadit
Sámi servodaga birra dávjá daddjo ahte tabufáttáid birra ii hállo, nu mo seksuála illástemiid birra. Dan lohká Marion Anne vásihan:
– Mii eallit dakkár servodagas gos čađat leat leamaš nu ahte dán birra ii gálgga hállot. In dieđe leago seamma ládje juohke sajis vai dušše min kultuvrras. Lean bajásšaddan dainna ahte dán birra ii galgga hállat. Muhto ii dán sáhte jávoheamit jávkadit, dan ferte hállamiin jávkadit. Mun sávan mu video dagaha ahte eambbosat dustet rahpasit dán fáttá birra.
– Miehtá riikka váldán oktavuođa
Mannan bearjadaga almmuhii ge Marion Anne video iežas facebooksiiddus, mas su logaldallan oidno. Video lea čuojahuvvon badjel 43 duhát geardde ja juhkkon lagabui 500 geardde.
– Mun fertejin vuđolaččat smiehttat ovdal go almmuhin video ja ráhkkanin dasa ahte soitet boahtit veahá reakšuvnnat, muhto hirpmáhuhtii go ná stuorra positiiva responsa bođii. Lean ožžon kommentáraid olbmuin geaid in oba dovdda ge, olbmot miehtá riikka leat čállán munnje. Nu ahte dál gal lean hui ilus go válljejin juohkit dan.
Son háliidii dáid čalmmustuhttot
Justa eatnis muitalusa son háliida ge čalmmustit. Marion Anne dáhttu eanet rabasvuođa tabufáttáid birra nu mo seksuála illástemiid birra.
– Ovdal go eadni jámii, de son háliidii ahte dát galggašii čuvgejuvvot. Su vásáhus bilidii su eallima ja vahágahtii mu eallima maid.
Logaldallamis muitalii Marion Anne ahte su mánnávuohta ii lean nu buorre go lei sáhttit. Bállu ja dorvvuhisvuohta lei oassin sin eallimis.
«– Illásteamit bilidedje su eallima. Mun livččen sávvan ahte dákkár fáttáid birra livčče hállon dalle jo go mu eadni lei mánná, ammal dalle ii lean su heahpu šaddat nu stuorisin.»
Marion Anne Knutsen logaldallamis
– Lei buorre čuččodit dies
Semináras Marion Anne vuosttaš geardde hálai almmolaččat iežas mánnávuođas ja eatnis vásáhusaid birra.
– Lei issoras álggus, muhto lei hui buorre čuččodit dies, šattai seammás dego gieđahallan. Máŋga kilo loktanedje eret mu olggiin. Lei maid hui erenoamáš dovdu oaidnit mo guldaleaddjit vuostáiválde mu muitalusa ja duođaid guldaledje. In máhte čilget dan dovddu mii mus lei maŋŋil go gergen, čilge Marion Anne.
– Čuozai buohkaide
Ávvir ii fáhten semináralágideddjiid ságaide, muhto Anne Kalstad Mikkelsen, guhte lei okta lágideddjiin semináras ja guhte maiddái logaldalai tabufáttáid birra semináras, lea Avisa Nordland áviisii muitalan ahte Marion Anne logaldallan čuozai buohkaide geat ledje guldaleamen su.
– Lea váttet muitalus, seammás go lea hui áigeguovdil sámi servodagas, lohká son.
Mikkelsen lohká ahte tabuid duostat rasttildit ja hállat morraša, doaivaga ja mo hálddašat iežamet eallimiid lea hui dehálaš.
– Mii fertet čájehit ahte galgat leat rahpasat nubbi nubbái, ahte duostat čájehit hearkivuođamet.
