-Almmuhus-
-Almmuhus-
-Almmuhus-
OĐĐASATGolgodávdda geažil gidden skuvlla

Golgodávdda geažil gidden skuvlla

-

-

Lujávrri skuvlla klássalanjat leat badjel vahkku juo leamaš guoros golgodávdda dihte.

Go guovtti beaivvis buohccájedje 90 oahppi fáhkka golgodávddain, de skuvlla stivra mearridii giddet skuvlla. Mánáiddoaktárat muitalit ahte sii leat vuosttaš háve vásihan dakkár dilálašvuođa go nu olu mánát leat buohcan fáhkkestaga ja oktanaga.

 

Golgodávda ii leat erenoamáš dahje heaggaváralaš dávda. Sihke oahpaheaddjit ja mánáiddoaktárat leat juo hárjánan dasa ahte juohke jagi mánáidgárddiin ja skuvllain muhtin mánát ožžot golgodávdda ja buohccájit, muhto sin muittus ii leat vel leamašan nu ahte dušše moatti beaivvis leat buohcan čuođi golbmalogi njeallje Lujávrri mánát.

 


Lujávrri skuvlla sihke siste ja olggobealde lea erenoamážit jaskat.

 

Ovccilogi buohcci guovtti beaivvis

Mannan bearjadaga šattai Lujávrri skuvllas alla jávkan go ovccilogi oahppi eai lean boahtán skuvlii golgodávdda geažil.

– Mannan gaskavahkku finai okta oahppi eará gávpogis ohppiiddoalus, ja dovdagođii heajos foarpma, ja go mihtideimmet su febera mii čájehii gitta 40 gráda de su dolvo buohccevissui. Soaitá leat sus njoammun vuolgán go duorastaga mii fuobmáimet ahte measta 30 oahppi eai leat boahtán skuvlii, ja bearjadaga vel 60 oahppi ledje eret skuvllas. Váhnemat čilgejedje ahte sin mánát leat ožžon golgodávdda. Vai eastadit ain eambbo ohppiid njoammuma skuvllas, de stivra mearridii giddet skuvlla, muitala Lujávrri skuvlla direktevrra ovdaolmmoš Fatima Gurova.

– Dat ii leat dieđusge vuosttaš háve go mánát buohccájit ja ovddit jagiid leat mii maid šaddan giddet skuvlla moatti beaivái, muhto ii leat vel goassege dahpahuvvon ahte juohke goalmmát oahppi lea oktanaga buohccán, muitala Gurova.

 


Golgodávda buvttii oahpaheddjiide liige barggu ja Lujávrri skuvlla direktevrra ovdasolmmoš Fatima Gurova vázzá skuvllas máskkain.

Ožžot liige skuvladiimmuid

Golgodávda ja jávkan skuvllas buvttii olu váttisvuođaid sihke oahpaheddjiide ja ohppiide. Oahpaheaddjit leat šaddan rievdadit ja heivehit skuvlaprográmma ja ohppiide šaddet eanet skuvladiimmut vai skuvlejit jávkama fas sisa.

– Dál go mánát leat eret mii ráhkadit ođđa prográmma ja fertet lasihit skuvlabeaivái vel 1 – 2 liige diimmu, mii šaddá lossat mánáide, muhto mis ii leat eará válljenvejolašvuohta go ferte čuovvut skuvlaprográmma, ja dárbbašlaš skuvladiimmuid haga mii eat oačču bidjat árvosániid ja luoitit geasselupmui, čilge direktevrra ovddasolmmái. Dat guoská erenoamážit maŋimuš luohkáid ohppiid, muitala Gurova.

 

Gidden astoáigedoaimmaid maid

Eaige ieža oahppit leat duhtavaččat dainna bággoluomuin. Viđat luohká oahppi Sergei Chuprov maid oaččui golgodávdda skuvllas ja fertii orrut ruovttus ja fitnat buohcceviesus. Son lea juo dearvvasmuvvamin, muhto maid oaidná iežaset minusiid errenáiggis.

 


Sergei Chuprov ii leat duhtavaš dainna go bággenluomu geažil šaddá čáppa giđđadálkki áiggis guhka čohkat skuvllas.

– Livččii olu buoret vázzit dál skuvlla go olgun ii leat buorre dálki, ja go boahtá álbmá giđđa ja čáppa dálki de mii šaddat guhkká čohkkat skuvllas, čilge skuvlagánda iežas oainnu dilálašvuhtii.

Earret Lujávrri skuvlla, de ledje gidden maid visot eará mánáid astoáiggedoaimmaid ja bissehan eará doaluid gos mánát sáhtášedje njoammut earáid.

 

Boahkut eai leat veahkehan

Golgodávda lea erenoamáš olu barggu buktán Lujávrri mánáiddoaktáriidda ja sii gohčodit sihke golgodávdda ja áigodaga eahpelunddolažžan.

– Mannan duorastaga ja bearjadaga šattai mis hirbmat olu barggu. Dušše guovtti beaivvis leat 130 skuvlla– ja mánáidgárddimáná oktanaga buohccán. Su mielas dat lei duođai erenoamáš, go áigodaga mielde lea golgodávda nohkan juo badjel mánu áige ja eanaš mánát ledje maid boahkuhuvvon ovdalgihtii. Golgodávda lei veahá erenoamáš go mánáide njoamui feber dušše ovtta diimmus ja sáhtii njuiket gitta 40 grádii. Dan guovtti beaivvis eai ádden doaktárat makkár golgodávda mánáin lea, ja lei váttis bidjat rievttes diagnosa ja álgit dálkkodeami, muitala mánáiddoavttir Marina Dubovtceva.

 


Lujávrri mánáiddoavttir Marina Dubovtceva ii muitte, ahte Lujávrris goassege leamašan dakkár dilálašvuohta golgodávddain.

– Mii šattaimet ohcat veahkki Murmánskkas, gosa sáddiimet iskosiid ja oaččuimet dieđu ahte mánáin lea golgodávda mearkkain B ja min mánát ledje boahkuhuvvon A mearkka vuostá, muhto go dat njoammudávda juohke jagi rievdá – de boahkkuin ii lean ávki, čilge Marina Dubovtceva.

 

Mannan váhkoloahpa lea leamašan doaktárii oalle losses áigin go olu buhcciid luhtte leat šaddan ieža fitnat. Lávvordaga lea Marina fitnan dálkkodeamen 34 máná ruovttuin.

– Dat lei duođai lossat ja dat lei vuosttaš háve go mu muittu mielde ná olu mánát leat buohccán oktanaga ja dat mii lei imáš ahte golgodávda lea dušše mánáide čuohcan, ollesolbmuide ii guoskan dat dávda, lohká mánáiddoavttir.

 


Dan sadjái go vázzit skuvlla Lujávrri mánát fitnet buohcceviesus.

Dilálašvuohta Lujávrris dađistaga buorrána ja mánát dearvvasmuvvet. Skuvllas plánejit álggahit oahpahusa boahtte vahkku maŋŋebárgga dahje duorastaga, muhto Lujávri ii leat áidna ássanbáiki Guoládagas gosa joavddai golgodávda. Dušše gaskavahkku fitne badjel njeallje čuođi buohcci seammá dávddain Murmánska buohcceviesuin.

 


Mánáidgárddis lei maid golgodávda njommon muhtin mánáide, muhto dain ásahusain leat nagodan eastadit dávdda leavvama.

Čállán ja govven:

Aleksander Paul
Jevgenij Kirillov

-Almmuhus-