Norgga Sámiid Riikkasearvvi Lulli-Norgga sámediggelahtut illudit go Oslo suohkan ja Sámediggi leat šiehttan ovttasbarggu, ja sis leat alla vuordámušat šiehtadussii.
Norgga Sámiid Riikkasearvvi Lulli-Norgga sámediggelahtut illudit go Oslo suohkan ja Sámediggi leat šiehttan ovttasbarggu, ja sis leat alla vuordámušat šiehtadussii.
Oslos orrot eanemus sámit Norggas, ja leat sámit buot sámi guovlluin geat orrot Oslos. Norgga Sámiid Riikkasearvvi Lulli-Norgga sámediggelahtuin leat alla vuordámušat šiehtadussii man Sámediggi ja Oslo suohkan leat vuolláičállán guovvamánu 6. beaivvi 2016 Oslo Ráđđeviesus.
Ovdánahttit sámegiela mánáidgárddiin
Anita Persdatter Ravna lea duhtavaš go Sámediggi doalahii prinsihpalaš gáibádusaid sámegielas mánáidgárddiin, go dán ášši leat máŋggaid jagiid dorron. Lea dehálaš ahte suohkan lihkostuvvá giellaoahpahemiin mánáidgárddis, go dat lea vuođđun mánáid giellaovdáneamis.
– Mun muittán go alddán ledje mánát dan mánáidgárddis ja oaččuimet gussiid Oslo 5. gávpeoasis geat nu illosedje go oidne ahte «mánát stohke nu bures dárogillii». Dalle rahpase čalmmit mus, muitala Ravna. Lea hui buorre go Oslo suohkan dál čájeha ahte lea dáhttu ovdánahttit sámegiela sámi mánáide Oslos. NSR vuordá ahte Oslo gielda čuovvola šiehtadusa, ja barget viidáset nannet Oslo sámi mánáidgárddi.
Sámegiela seailluhit ja ovdánahttit
Kirsti Guvsám áigu deattuhit giellalávdegotti oasseraportta mas lávdegoddi evttoha erenomáš lohpádusaid muhtin gávpotosiide. Evttohuvvo ahte Oslo suohkan, mii lea Norgga oaivegávpot ja stuorámus gávpot, ferte oažžut ovddasvástádusa buot golmma sámegielaide Norggas. Eai leat beare galle lunddolaš sámi sámegiel báikkit ja čoaggananbáikkit gos sámegiela beassá hupmat ja ovdánahttit.
– Lea illudahtti go bellodagat oidnet makkár árvu Sámi Viesus lea sámi álbmogii Oslos, ja ahte suohkanis háliidit veahkehit ovdánanvejolašvuođaiguin Sámi Viesus. Sámegiel fálaldaga ovdánahttima olis galggašii ásahit sámi giellaguovddáža Osloi, lohká Guvsám.
Guvsám sávvá maid ahte Gávpotráđi vuoruhit ruđa reviderejuvvon bušehttii dán giđa mas Sámi Viessu vuoruhuvvo.
Ferte kártet sámiid dearvvašvuođadárbbuid
Tor Gunnar Nystad oaivvilda leat áiggi oažžut johtui barggu ásahit dárbbašlaš fálaldagaid dearvvašvuođa- ja sosiálaossodagain sámi álbmogii Oslos. Dakkár bargu gáibida kártet sámi álbmoga dárbbu. Álbmotdearvvašvuođalágas lea suohkan geatnegahtton kártet suohkanássiid dearvvašvuođa. Seamma fertejit dahkat sámi álbmogii Oslos.
– Kártemis galgá čilgejuvvot dulkonbálvalusaid ja erenomašbálvalusa dárbbuid. Vuosttaš ovttasbargočoahkkimis ferte kártenbargu digaštallot ja ovddasvástádus ferte juhkot Oslo suohkanis, deattuha Nystad.
