-Almmuhus-
OĐĐASATProsederii 2014 njukčamánu mearrádusa lobiheapmin, go rihkku álbmotrivttiid

Prosederii 2014 njukčamánu mearrádusa lobiheapmin, go rihkku álbmotrivttiid

-

-

Odne lea maŋemuš diggebeaivvi Sis-Finnmárkku dikkegottis gos Fálá orohaga siidaoasseeaiggát Jovsset Ánte Sara lei stevdnen stáhta Eanandoallo- ja biebmodepartemeantta go oaivvilda eisseválddiid mearridan alcces menddo vulos boazologu. Su advokáhtta prosederii stáda mearrádusa lobiheapmin go rihkku álbmotrievtti.

Sara advokáhtta Tron Biti lea čađahan iežas prosedyra diggái, mas earret eará ovdanbuvttii ahte sii, geain ledje unnán bohccot, leat gillán eanemusat go unnidanproseassa čađahuvvui gorrelogu vuođul.

– Ovdamearkka dihtii unnidit 100 bohccuin 500 ealu, dáinna sáhttá eallit, muhto vuolidit 200:s čuođi heggii dat čuohcá issorasat. Čuohcá garrasepmosit sidjiide geain leat unnimus bohccot, lohká Biti.

 

Reastaluvvá

Son lea geassán ovdan Ovttastuvvon Našuvnnaid konvenšuvnna mii lea siviila ja politihkalaš vuoigatvuođaid birra – namalassii artihkal 27 – mas daddjo ahte juohkehaččas lea «riekti doaimmahit iežas kultuvrra». Trond Biti lohká ahte Saras lea veadjemeahttun doaimmahit iežas kultuvrra mearriduvvon boazologuin. Biti deattuha áibbas sihkarin ahte álbmotriekti maiddái gáhtte ekonomalaš beliid. Dan oktavuođas lea ge čuoččuhus, ahte duohtavuođas ii leat Saras šat oba doaivva ge joatkit boazodoaluin. Son boahtá dasto dainna mearriduvvon boazologuin reastaluvvat jus joatká boazodoaluin.

 

Láhka ii gáhtte unnimusaid

Trond Biti oaivvilda ahte boazodoalloláhka ii gáhtte sin geain lea unnimus.

– Ođđa láhka lea oalle roavis, ii gáhtte geange, ii ge váldde vuhtii geange. Láhka čuolasta buohkaid ležžet dal unnán vai ollu bohccot, eai ge leat guorahallan váikkuhusaid, lohká Biti.

 

Stuorra váikkuhusat

Advokáhtta Biti oaivvilda stáhta duvdán ovddasvástádusa boazosápmelaččaide, go čujuha siskkáldas iešmearrideapmái nu go lágas čuožžu.

– Sarai leat stuorra váikkuhusat ja lea váldán stuorámus noađi unnidanproseassas, oaivvilda Biti.

 

Lossat, muhto gelddolaš

Jovsset Ánte Sara lohká otná beaivvi gelddolažžan, go beassá gullat ráđđehusadvokáhta ákkasteami.

– Dál lea gelddolaš beaivvi. Lean dieđusge geavahan ollu návccaid ja leat lossa beaivvit leamašan. Guoddalan jus diggi ii váldde vuhtii mu, lohká Sara.

-Almmuhus-