Ráđđehusadvokáhtta čuoččuhii dikkis odne ahte Jovsset Ánte Sara birge buorebut 75 heakkain go ovdamearkka dihte 116 heakkain.
Ráđđehusadvokáhtta čuoččuhii dikkis odne ahte Jovsset Ánte Sara birge buorebut 75 heakkain go ovdamearkka dihte 116 heakkain.
Ráđđehusadvokáhtta Ida Thue gesii ovdan álggosártnis Sis-Finnmárkku dikkegottis mo lágalaččat boazodoallu hálddašuvvo boazodoallolága ektui, mii lea ášši duogáš ja mo stáhta oaidná Jovsset Ánte Sara ášši.
Thue lohká riidu stáhta mearrádusas lea mo dulko ja ádde juridihka, ja makkár ekonomalaš hástalusaid unnideapmi lea dahkan, go čuoččuha ahte Jovsset Ánte Sara buorebut birge 75 heakkain go 116 heakkain, ja čujuha ahte njuovvandeattuin dan sáhttá oaidnit.
Ida Thue deattuha ahte earát leat čađahan unnideami ja doahttalan stáhta mearrádusa, ja lea dušše Jovsset Ánte Sara guhte lea biehttalan čuovvomis stáhta gáibádusa, čilge ráđđehusadvokáhtta dikkis.
– Ii riidu stáhtáin, muhto eará siidaoasseeaiggádiiguin
Ráđđehusadvokáhta oaidnu lea ahte Jovsset Ánte Sara riidu ii leat stáhtain, muhto eará siidaoasseeaiggádiiguin orohagas. Son čilge ahte boazodoalloláhka lea hábmejuvvon nu ahte lea iešstivrejupmi ealáhusas nu go árbevierru lea. Nu čuoččuha ahte Sara livččii galgan soabadit eará boazodolliiguin iežas boazologu. Son joatká ahte lea dehálaš oažžut earáid mielde, nu doibmet njuolggadusat, deattuha son. Ida Thue joatká muitaleames ahte Jovsset Ánte Sara lea nuorra, ja easkaálgis ferte leat veaháš lihkku, ja lea priváhta gažaldat iige stáhta duohken mearridit galle bohcco guđege siida galgá oamastit.
– Ii juridihkalaš gažaldat
Thue joatká čilgemis ahte vuođđogeasus boazodoalus lea politihkalaš gažaldat iige juridihkalaš gažaldat mas diggi ii galgga váldit mearrádusa. Láhkalávdagoddi lei ge evttohan dakkár vuođđogeasu ahte vuosttaš 200 bohcco galge buot siidaosiin gáhttejuvvot. Dat livččii mearkkašan ahte ii ovtta ge siidaoassái livčče de sáhttán mearridit unnit go 200 bohcco. Dan oasi sihkui Stuorradiggi dalle go mearridedje ođđa boazodoallolága 2007:s.
Ida Thue deattuha ahte boazologu juohkin lea siskkáldas orohatmearrádus, nu gohčoduvvon siskkáldas iešmearrideapmi.
Son mieđiha ahte boazodoallis, geas leat ollu bohccot, lea stuorra ovdamunni ja lea eambbo fápmu go sis geain leat unnit bohccot ja čujuha ahte sáhttá leat váttis leat unnin ja easkaálgin, nu go Jovsset Ánte Sara, jus ii oaččo eará siidaeaiggádiid mielde.
Thue deattuha ahte ii leat stáhta duohken mearridit siiddaide vuolimus boazologu, dat ii čuoččo lágas.
