-Almmuhus-
-Almmuhus-
-Almmuhus-
OĐĐASAT–Álgoálbmogat šaddet dovdat dálkkádatrievdama

–Álgoálbmogat šaddet dovdat dálkkádatrievdama

-

-

Mánnodaga COP21 digaštallamis Arctic Frontiers semináras, gullui ahte olusat oaivvildedje stuorra dálkkádatkonferánssa leat lihkostuvvan. Dása ii lean Aili Keskitalo áibbas ovttaoaivilis.

Mánnodaga lei COP21-digaštallan Arctic Frontiers oktavuođas mii lágiduvvo Norgga árktalaš universitehtas (UiT) dán vahkku. Digaštallama ledje dutkit UiT:s lágidan, geat ieža serve dálkkádatčoahkkimii Parisas. Doppe jerrui «Lihkostuvai go COP21», čállá universitehta preassadieđáhusastis.

– Árktalaš guovlluid álgoálbmogiin ja eará máilmmi álgoálbmogiin ledje alla vuordámušat COP21 čoahkkimii, muhto loahppaboađus behtii. Mii leat beahtahallan dan dihte go dat juridihkalaš bealit eai vuhtii váldde álgoálbmogiid rivttiid doarvái, dajai sámediggepresideanta Aili Keskitalo paneladigaštallamis.

 

Lihkostuvai bures

Dálkkádat- ja birasministtar Vidar Helgesen álggahii digaštallama. Son oaivvilda ahte COP21 lihkostuvai bures, čállá UiT neahttasiiddus.

– Dálkkádatčoahkkin lei lávki rievttes guvlui. Dán máilmmis, mii lea nu juohkásan oaiviliiguin, ja mas leat nu ollu digaštallamat, lea váttis gártat áibbas ovttaoaivilii juohke áššis. Go nie ollu riikkat šiehtadallet oktasaš dálkkádatmihtuid, lassin ahte galget šiehtadallat juohke viđat jagi, lea buorre boađusin dálkkádatčoahkkimis, dadjá Helgesen.

 

Čeahpit geavahit resurssaid

Paneladigaštallamis lei Norgga ambassadevra Parisas, Rolf Einar Fife, ON-biebmoprográmmas lei Doaa Abdel-Motaal, Aarhus universitehtas lei Cécile Pelaudeix boahtán ja sámediggepresideanta Aili Keskitalo. Rasmus Bertelsen (UiT) lei moderator.

Norgga ambassadevra Parisas, Rolf Einar Fife, lea ovttaoaivilis dálkkádat- ja birasministariin.

– COP21 lei stuora lávki ovddos guvlui, ja dat addá leavttu politihkalaš proseassaide iešguđet dásiin, dadjá Fife.

– Lehpet čeahpit árktalaš guovlluin geavahit resurssaid ceavzilvuođain, ja gávdnabehtet ođđa vugiid movt sáhttá viežžat energiija, nu go bieggamillofámu. Lea dynámalaš ja optimisttalaš vuohki, ja COP21 bohtosiin čájehit guđe guvlui mannat viidáset, lohká Fife.

 

Ii heive oktii boazodoaluin

Keskitalo mielas ii leat nu álki go earát čuoččuhit.

– Mun lean vuorjašuvvan ođasmáhtti energiija molsašumi ektui. Ii leat vuoiggalaš álgoálbmogiidda, geat dovdet dálkkádatrievdama, ja geat seammás šaddet dovdat váikkuhusaid, dadjá Keskitalo.

Son čujuhii bieggamillopárkii Nordlánddas mii hehtte joatkit boazodoalu dan guovllus. Son oaivvilda ahte lea dehálaš sihkkarastit álgoálbmogiid rivttiid dálkkádatpolitihka ektui, čállá Romssa universitehta.

– Dutkan čájeha ahte dain guovlluin, gos álgoálbmogat ieža mearridit arvevuvddiin, doppe lea buoret gáhttejupmi. Dat muitala maid ahte álgoálbmogat sáhttet veahkkin sihkkarastit máilmmi boahtteáiggi iežaset máhtuin, ja leat oassin čovdosis dan ovdii go leat váttisvuohtan, oaivvilda sámediggepresideanta Aili Keskitalo.

-Almmuhus-