– Lea dramáhtalaš dilli sámegiel oahpahusas go eai gávdno doarvái oahpaheaddjit gokčat dárbbu oahpahusain sihke sámegillii ja sámegielas, lohka Christina Henriksen.
– Lea dramáhtalaš dilli sámegiel oahpahusas go eai gávdno doarvái oahpaheaddjit gokčat dárbbu oahpahusain sihke sámegillii ja sámegielas, lohka Christina Henriksen.
Christina Henriksen (NSR/NSR-SáB), gii ieš lea sihke sámediggeláhttu ja oahpaheaddji, háliida loktet dási sámegiel oahpahusas norgga skuvllain. Henriksen sávvá oažžut máhttoministara fárrui dál go bovde Fylkkamánniid miehtá Norgga mielde loktet sámegiel fálaldaga skuvllain.
Fálaldat miehtá Norgga
Henriksen háliida riikaviidosaš kampánja ja ávžžuhit oahpaheddjiid miehtá riika ohcat sámegiela joatkkaoahpahussii.
– Sápmelaččat fárredit ja danne lea dehálaš ahte gávdno sámegiel fálaldat buot fylkkain Norggas, dadjá Christina Henriksen.
Doarjjaortnet
Henriksen háliida maid nannet gáiddusoahpahusa ja ohppiide addit galledanáiggi skuvllain gos lea sámegiella. Son háliida maid ahte váhnemiidda addo vejolašvuohta leat mielde giellaguossin dahje fárus leat giellačoagganemiin.
– Muhto leat ollu praktihkalaš hástalusat maid fertet čoavdit. Mun evttohan doarjjaortnega mii dahká vejolažžan váhnemiidda permišuvnna váldit ja mieđustit mánáid dáidda fálaldagaide nu ahte ii šatta váhnemiidda ekonomalaš roassun, lohka Henriksen.
– Eanet mánát ja nuorat geat sámástit lea mihttun, ja dan mii eat nagot jus mánát ja nuorat eai oaččo dan oahpahusa masa sis lea riekti. Dasa mii dárbbašit eanet oahpaheddjiid geat máhttet oahpahit sámegiela, loahpaha Henriksen.
