-Almmuhus-
OĐĐASATHelikopter gahčai Ráisávžžis ikte

Helikopter gahčai Ráisávžžis ikte

-

-

Helikopter mas lei okta olmmoš gahčai ikte Ráissa álbmotmeahcis. Girdivuoddji sáddejuvvui Davvi-Norgga buohccivissui, ii ge lean nu bahut roasmmohuvvon.

Helikopter lei jođus Ruŧŧii go gahčai Ráissa álbmotmeahcis. Helikopteris lei okta olmmoš, ja son lei vuolgán Álttás Ruŧŧii.

 

Eai dieđe

Eai dieđe sihkkarit mii dáhpáhuvai helikopteriin ja vuddjiin dan áiggi ovdal go Váldogádjunsentrála (HRS) olleje báikái gosa lei gahččan.

– Mii eat dieđe nu ollu dáhpáhusas. Soaitá seivon beare garrasit dahje jo áimmus gahččan vulos. Helikopter lea vehá billahuvvan, nu ahte ii leat sihkar sáhttá go dan girdit eret dahje sirdit eará vuogi mielde, muitala HRS gádjuninspektevra Tore Vangsfjord Framtid i Nord aviisii. Sotnabeaivvi iđđedis eai sáhte politiijat vel muitalit eanet movt dáhpáhuvai lihkohisvuohta.

 

Buohcciviesus

Dievdu gii girddii helikoptera lea dál Davvi-Norgga Universitehta buohcciviesus ja lea čielggi bávččagahttán.

– Son ii lean bahut roasmmohuvvon ja lei gozuid alde go mii bođiimet báikái. Mii vulggiimet ovttatmanu go čájehuvvui ahte lei dáhpáhuvvan lihkohisvuohta. Midjiide bođii heahtediehtu helikopteris, ja ii lean vejolaš oažžut oktavuođa helikopteriin, lohka Vangsfjord.

 

HRS girde Sea-King helikopteriin báikái gosa lei gahččan helikopter, ja sáddejuvvui vel ambulánsahelikopter báikái.

Dáhpáhus lei Ráisávžžis Nedrefoss lahkosis. Politiijat dutket dáhpáhusa.

 

-Almmuhus-